ബ്രസല്സ്:സാമ്പത്തിക ലോകം ആശങ്കയോടെ കാത്തിരുന്ന പ്രതിസന്ധിക്ക് താത്കാലിക പരിഹാരം.പ്രതിസന്ധി പരിഹരിക്കുന്നതിന് ഗ്രീസും യൂറോപ്യന് യൂണിയനും ധാരണയിലെത്തി. ഇതനുസരിച്ച് ഗ്രീസിന് മൂന്നാംഘട്ട സാമ്പത്തിക സഹായം നല്കാന് യൂറോസോണ് തീരുമാനിച്ചു. 86 ബില്യണ് യൂറോയാകും സഹായമായി ലഭിക്കുക. കരാര് നടപടികള് ഗ്രീസ് പാലിക്കുന്ന മുറയ്ക്കാകും ഇത്. ഇരുകൂട്ടരും മുന്നിലപാടുകളില് വിട്ടുവീഴ്ച ചെയ്താണ് ധാരണയിലെത്തിയതെന്ന് റിപ്പോര്ട്ടുകളെങ്കിലും വിശദാംശങ്ങള് പുറത്തുവിട്ടിട്ടില്ല.
സ്വന്തം രാജ്യത്ത് പ്രതിഷേധങ്ങളുയര്ത്തുമെന്നതിനാലാണ് അതിനു തുനിയാത്തതെന്നും സൂചനകള്.
നെതര്ലന്ഡ്സ് ധനമന്ത്രി ജെറോം ദിജിസല്ബ്ലോം നയിക്കുന്ന 19 യൂറോപ്യന് ധനമന്ത്രിമാരടങ്ങിയ യൂറോസോണ് ആണ് 17 മണിക്കൂര് ചര്ച്ചയ്ക്കൊടുവില് ഗ്രീസുമായി ധാരണയിലെത്തിയത്. ആദ്യവട്ട ചര്ച്ചകളില് ഫലമുണ്ടാകാതായതോടെ ഗ്രീക്ക് പ്രധാനമന്ത്രി അലക്സി സിപ്രസ് പുതിയ നിര്ദേശങ്ങളുമായി എത്തിയതു ചര്ച്ചകള്ക്കു ജീവനേകി. പെന്ഷന് പരിഷ്കരണം, ചെലവുചുരുക്കല്, നികുതി വര്ധന എന്നിവ ഭേദഗതികളോടെ നടപ്പാക്കാമെന്ന് സിപ്രസ് വ്യക്തമാക്കി. ഈ നിര്ദേശങ്ങള് അംഗീകരിക്കാനാകില്ലെന്ന് വാദമുയര്ത്തിയാണ് സിപ്രസ് ജനഹിത പരിശോധന നടത്തിയത്. ബുധനാഴ്ച പാര്ലമെന്റില് വിഷയം അവതരിപ്പിച്ച് നിയമമാക്കുമെന്നു ഗ്രീക്ക് നേതാക്കള്.
ഗ്രീസിനെ ശക്തമായി എതിര്ത്ത ജര്മനി നിലപാട് മയപ്പെടുത്തിയതും സമവായത്തിന് തുണയായി. യൂറോ സോണിലേക്ക് ഏറ്റവും കൂടുതല് സംഭാവന നല്കുന്നത് ജര്മനിയാണ്. ഗ്രീസ് നിബന്ധനകള് അംഗീകരിച്ചാല് വ്യാഴാഴ്ച ജര്മന് പാര്ലമെന്റ് യോഗംചേര്ന്ന് നടപടികളുമായി മുന്നോട്ടുപോകാന് ചാന്സലര് ഏയ്ഞ്ചല മെര്ക്കിലിനും ധനമന്ത്രി വോള്ഫ്ഗാങ് ഷ്യൂവബിളിനും അനുമതി നല്കും. തുടര്ന്ന് യൂറോപ്യന് ധനമന്ത്രിമാര് യോഗം ചേര്ന്ന് സഹായം പ്രഖ്യാപിക്കും.
അതേസമയം, യൂറോസോണ് നിബന്ധനകള് അംഗീകരിക്കുന്നത് തിരിച്ചടിയാകുമെന്ന ഭയം സിപ്രസിനുണ്ട്. സ്വന്തം പാര്ട്ടിയായ സിരിസയെ ഇതെങ്ങനെ ബോധ്യപ്പെടുത്തുമെന്ന ചോദ്യം ആദ്യം. പാര്ലമെന്റിനെ അഭിമുഖീകരിക്കും മുന്പ് പാര്ട്ടിയെയും പത്ത് കക്ഷികള് ഉള്പ്പെടുന്ന മുന്നണിയെയും എങ്ങനെ ബോധ്യപ്പെടുത്തുമെന്നതും നിര്ണായകം. യൂറോപ്പിന്റെ നിര്ദേശങ്ങളെ എതിര്ക്കണമെന്ന നിര്ദേശമാണ് ജനഹിത പരിശോധനയില് ഉയര്ന്നതെന്നതും വെല്ലുവിളി. സിപ്രസിന്റെ നിലപാടില് മന്ത്രിസഭയിലും പാര്ട്ടി എംപിമാരിലും എതിര്പ്പുണ്ട്. നടപടികള്ക്ക് പാര്ലമെന്റ്അംഗീകാരം നല്കിയില്ലെങ്കില് കാര്യങ്ങള് തകിടം മറിയും.
