ബിഷ്കേക്ക്:വിഘടനവാദവും ഭീകരപ്രവര്ത്തനങ്ങളുമാണ് ലോകത്തെ പ്രധാനപ്രതിസന്ധിയെന്ന് പ്രധാനമന്ത്രി നരേന്ദ്രമോദി. കിര്ഗിസ്ഥാന് സന്ദര്ശനത്തിനിടെ പ്രസിഡന്റ് അല്സമബെക് അതംബയേവുമായി നടത്തിയ കൂടിക്കാഴ്ചയിലാണ് ഇക്കാര്യം അദ്ദേഹം വ്യക്തമാക്കിയത്. സന്ദര്ശനവേളയില് സംയുക്ത സൈനിക അഭ്യാസ പ്രകടനങ്ങളുള്പ്പടെ നാലു കരാറുകളില് ഞായറാഴ്ച ഇരുരാജ്യങ്ങളും ഒപ്പുവെച്ചു.
തുര്ക്മെനിസ്ഥാന് സന്ദര്ശനത്തിനുശേഷം ശനിയാഴ്ച രാത്രിയോടെയാണ് പ്രധാനമന്ത്രി നരേന്ദ്രമോദി കിര്ഗിസ്ഥാനിലെത്തിയത്. അന്താരാഷ്ട്ര ഭീകരപ്രവര്ത്തനങ്ങള്ക്കെതിരെ ഒരുമിച്ചുപ്രവര്ത്തിക്കുന്നതുമായി ബന്ധപ്പെട്ടും കാരാറില് ഏര്പെട്ടിട്ടുണ്ട്. സമാധാനവും സുരക്ഷിതത്വവും ഒരുപോലെ കാത്തുസൂക്ഷിക്കുന്ന അയല്ക്കാരാകണമെന്നും നരേന്ദ്രമോദി പറഞ്ഞു. ഇരുരാജ്യങ്ങളുടേയും സൈനികബലം വര്ധിപ്പിക്കുന്നതിനായി പ്രതിവര്ഷം ഇരുരാജ്യങ്ങളുടേയും സംയുക്ത അഭ്യാസപ്രകടനങ്ങള് നടത്തുന്നതാണ്. ഖന്ജന് 2015 എന്നാണ് ഈ അഭ്യാസ പ്രകടനങ്ങള്ക്ക് പേര് നല്കിയിരിക്കുന്നത്.കൂടാതെ അതിര്ത്തിയിലെ സൈനിക ബന്ധം മെച്ചപ്പെടുത്തുന്നതിനും സംയുക്ത സൈനിക വിദ്യാഭ്യാസവും പ്രത്യേക പരിശീലനവും നടത്തുന്നതാണ്.
ടെലി മെഡിസിന് രംഗത്ത് കിര്ഗിസ്ഥാനുമായുള്ള ബന്ധം വളര്ത്തിയെടുക്കുന്നതു സംബന്ധിച്ചും ഇരുവരും ചര്ച്ച നടത്തി. അതേസമയം, എക്യരാഷ്ട്ര സഭ സുരക്ഷാ കൗണ്സിലില് സ്ഥിരാംഗത്വത്തിനായി ഭാരതത്തിന് പിന്തുണ നല്കിയതിന് പ്രധാനമന്ത്രി നരേന്ദ്രമോദി രാജ്യത്തിന്റെ നന്ദി അറിയിച്ചു. കൂടാതെ യുറേഷ്യ എക്കണോമിക് യൂണിയന്റെ ഭാഗമായതില് അതംബേവിനെ അഭിനന്ദനങ്ങളും അറിയിച്ചു.
യൂറേഷ്യന് രാജ്യങ്ങളും ഭാരതവും തമ്മില് സ്വതന്ത്ര വ്യാപാരം നടത്തുന്നതിനുള്ളതാണ് ഈ യൂണിയന്. കിര്ഗിസ്ഥാന് ഖനന, ഫാര്മസ്യൂട്ടിക്കല് മേഖലകളില് നിക്ഷേപം നടത്താനുള്ള ഭാരതത്തിന്റെ തീരുമാനത്തെ അതംബേവ് സ്വാഗതം ചെയ്തു. സാമ്പത്തിക രംഗത്ത് ഒരുമിച്ച് പ്രവര്ത്തിക്കുന്നത് രാജ്യങ്ങള് തമ്മിലുള്ള ബന്ധം വളരാനും സഹായകമാകും.
ഇരുരാജ്യങ്ങളുടേയും തെരഞ്ഞെടുപ്പ് കമ്മീഷനുകള് തമ്മിലും സാമ്പത്തിക രംഗത്തും ഒന്നിച്ചുപ്രവര്ത്തിക്കുന്നതിനും വിനോദസഞ്ചാര മേഖല, കാര്ഷികം, ജലസംരക്ഷണം തുടങ്ങിയ മേഖലകളില് ഒന്നിച്ചു പ്രവര്ത്തിക്കുന്നതിനും ഇരുരാജ്യങ്ങളും തമ്മില് കരാറില് ഏര്പ്പെട്ടിട്ടുണ്ട്.
