സാമൂഹ്യവ്യസ്ഥിതിയില്പ്പെട്ട എല്ലാ ആശ്രമങ്ങള്ക്കും ആധാരം ഗാര്ഹസ്ഥ്യമാണ്. ഈ ആശ്രമത്തെ ഉല്കൃഷ്ടമായ മൂല്യങ്ങളില് പടുത്തുയര്ത്തുമ്പോള് സമാധാനപ്രിയരും ധര്മ്മാധിഷ്ഠിതരും ഈശ്വരവിശ്വാസികളുമായ ഒരു തലമുറ ഉയര്ന്നുവരും വിശ്വാസരാഹിത്വവും ധര്മ്മപഥത്തില് നിന്നുള്ള വ്യതിചലനവുമാണ് ആധുനിക കാലത്തിന്റെ അധഃപതനത്തിനുള്ള രണ്ടു കാരണങ്ങള്. പുരാണ ഭാരതത്തില് ആദ്ധ്യാത്മിക സംസ്കാരമാണ് രാജ്യത്തെ സംരക്ഷിക്കുന്നത്. ഇന്നാകട്ടെ ആ മഹല് സംസ്കാരം ക്രമേണ നശിച്ചുവരുന്നു.
നിങ്ങള്, ഗൃഹസ്ഥാശ്രമികള് ഇപ്പോഴാണ് സാന്മാര്ഗ്ഗികതയുടെയും ആദ്ധ്യാത്മികതയുടെയും മഹത്വത്തിന്റെ കൊടുമുടിയിലേക്ക് ഉയരേണ്ടത്. അമ്മയുടെ ഉപദേശങ്ങള് നിങ്ങളുടെ ജീവിതത്തിലേക്ക് പകര്ത്തുവിന്. യോഗസങ്കേതങ്ങള് നിങ്ങളുടെ കര്ത്തവ്യങ്ങളില് പ്രയോഗിക്കുവിന്. മനസ്സിനെ നിയന്ത്രിക്കാനുള്ള സാധനകളനുഷ്ഠിച്ച് ഈശ്വരനുമായുള്ള ആന്തരിക ബന്ധത്തേയും സ്വധര്മ്മത്തേയും കണ്ടെത്തുവിന്.
ധര്മ്മാചരണം ഭക്തിയോടും ശ്രദ്ധയോടും ബന്ധപ്പെട്ടിരിക്കുന്നു. നിങ്ങള് ഈശ്വരനില് ദൃഢവിശ്വസമുള്ളവരാകുമ്പോള് സാന്മാര്ഗിക തല്പരത അനായാസേന വന്നുചേരും. അതുപോലെ നിങ്ങള് സ്വധര്മ്മത്തെ മുറുകെ പിടിക്കുമ്പോള് മനസ്സ് ഈശ്വരപ്രേമത്തിന്റെ മലര്വാടിയിലേക്കുയര്ന്നുകൊള്ളും. ഏവര്ക്കും അനുഷ്ഠിക്കുവാന് അവരുടേതായ ധര്മ്മങ്ങള് ഈശ്വരന് നല്കിയിട്ടുണ്ട്. ആ പാവന ധര്മ്മങ്ങളില് ഉറച്ചുനിന്നാല് ഗൃഹത്തിലേയും സമൂഹത്തിലേയും ജീവിതം ശാന്തിപ്രഭവും വിശുദ്ധവും സമഞ്ജസവുമായിത്തീരും.
സത്യം,ധര്മ്മം, ഭക്തി ഇവയുടെ പാതകളില് വളര്ന്നുവരാന് കുട്ടികളെ സഹായിക്കേണ്ടത് മാതൃധര്മ്മമാണ്. സനാതന ധര്മ്മത്തെ പുരസ്കരിച്ചുള്ള അമ്മയുടെ അവതാര മഹിമകളും ഉപദേശങ്ങളും അവരിലേക്ക് പകരുവിന്. ഭക്തിമാര്ഗത്തിലെ സാധനാക്രമങ്ങളും ഇവരെ പരിശീലിപ്പിക്കുവിന്.
