സാന്റിയാഗോ: രക്താര്ബുദത്തെ അതിജീവിച്ച 92 വയസുകാരി മുത്തശ്ശി ലോകത്തിലെ ഏറ്റവും പ്രായം കൂടിയ മാരത്തണ് ഓട്ടക്കാരി എന്ന ലോക റിക്കാര്ഡ് കരസ്ഥമാക്കി. സാന്റിയാഗോയില് റോക്ക് ആന്ഡ് റോള് മാരത്തണില് ഓടിയാണു 92 വയസുകാരി ഹാരിയേറ്റ് തോപ്സണ് റിക്കാര്ഡിന് ഉടമയായത്. ഏഴ് മണിക്കൂര് 24 മിനിട്ട് 36 സെക്കന്റിലാണ് 26 മൈലും 385 യാഡും താണ്ടി ലക്ഷ്യം കടന്നത്.
2010 ഹോണോലുലു മാരത്തണില് 92 വയസും 19 ദിവസവും പ്രായമുള്ള ഗ്ലാഡിസ് ബെറില് സ്ഥാപിച്ച റിക്കാര്ഡാണു 92 വയസും 65 ദിവസവും പ്രായമുള്ള ഹരിയേറ്റിന്റെ നേട്ടത്തില് പഴങ്കഥയായത്. കാന്സര് സൊസൈറ്റിയുടെ പ്രവര്ത്തനങ്ങള്ക്കായി പണം കണ്ടെടത്തുന്നതിനാണു ഹാരിയേറ്റ് മാരത്തണ് ഓട്ടം നടത്തിയത്. ഒരു ലക്ഷം ഡോളറാണു ചരിത്ര നേട്ടത്തിലൂടെ ഹാരിയേറ്റ് സമാഹരിച്ചത്. ഇത് ഇവരുടെ 17-ാമത്തെ റോക്ക് ആന്ഡ് റോള് മാരത്തണായിരുന്നു.
ഇത് വളരെ കഠിനവുമായിരുന്നവെന്നും ഇവര് പറഞ്ഞു. ഈ വര്ഷം മോശം വര്ഷമായിരുന്നു. ജനുവരിയില് ഭര്ത്താവ് മരിച്ചിരുന്നു. അതുകൊണ്ട് തന്നെ ശരിയായ രീതിയില് പരിശീലനം നടത്തുവാന് സാധിച്ചില്ലായെന്നും ഇവര് പറഞ്ഞു. കഴിഞ്ഞവര്ഷത്തെ സമയം ഏഴ് മണിക്കൂര് ഏഴ് മിനിട്ട് 42 സെക്കന്റായിരുന്നു. 70വയസ്സിന് ശേഷമാണ് ഇവര് മാരത്തോണില് പങ്കെടുക്കുവാന് തുടങ്ങിയത്.
