വാഷിങ്ടണ്: അമേരിക്കന് സ്റ്റേറ്റ് ഡിപ്പാര്ട്ടുമെന്റിന്റെ ഭീകരവിരുദ്ധ പരിശീലനം ലഭിച്ചയാള് ഇസ്ലാമിക് സ്റ്റേറ്റ് ഭീകരസംഘടനയില് ചേര്ന്നു. ജിഹാദിനായുള്ള ഒരു ഓണ്ലൈന് വീഡിയോവിലാണ് ഇയാള് പ്രത്യക്ഷപ്പെടുന്നത്. താജിക്കിസ്ഥാനിലെ മുന് പോലീസ് കമാന്ഡറായ കേണല് ഗുല്മറോ ഖാലിമോവ് ആണ് ഐഎസ്ഐഎസ് ഭീകര സംഘടനയില് ചേര്ന്നത്.
അമേരിക്കയില് നടന്ന ഭീകര വിരുദ്ധ പരിശീലനത്തില് മൂന്ന് തവണ പങ്കെടുത്തതായി ഇയാള് വീഡിയോവില് പറയുന്നു. ഇക്കാര്യം സ്റ്റേറ്റ് ഡിപ്പാര്ട്ട്മന്റ് ശരിവെച്ചതായി സിഎന്എന് റിപ്പോര്ട്ട് ചെയ്തു. 2003-2014 കാലഘട്ടത്തില് ഖാലിമോവ് താജിക്കിസ്ഥാനിലും അമേരിക്കയിലുമായി നടന്ന അഞ്ച് ഭീകര വിരുദ്ധ പരിശീലനക്യാമ്പില് പങ്കെടുത്തിട്ടുണ്ട്.
ഭീകരന്മാരുടെ ആക്രമണങ്ങളെ തടയുന്നതിനായിട്ടാണ് പരിശീലനം സംഘടിപ്പിച്ചത്. ഭീകരന്മാരെ നേരിടാന് തയ്യാറാണെന്ന രീതിയിലാണ് ഖാലിമോവ് പരിശീലനത്തിന് ചേര്ന്നത്.
ഭീകരവിരുദ്ധ പരിശീലനം ലഭിച്ചവര് ഭീകരസംഘടനയില് ചേര്ന്നത് വലിയ അപകടമാണെന്ന് മുന് ആര്മി ഇന്റലിജന്സ് ഓഫീസര് മൈക്കില് ബ്രീന് പറഞ്ഞു.
