ന്യൂജഴ്സി: പ്രശസ്ത ഗണിതശാസ്ത്രജ്ഞനും നൊബേല് ജേതാവുമായ ജോണ് നാഷും (86) ഭാര്യ അലീഷ്യയും കാറപകടത്തില് മരിച്ചു. ന്യൂജഴ്സിയില്ച്ച് ഇവര് സഞ്ചരിച്ചിരുന്ന കാര് അപകടത്തില്പ്പെടുകയായിരുന്നു.
ഗെയിം സിദ്ധാന്തത്തില് നാഷ് അവതരിപ്പിച്ച മൗലികാശയങ്ങളെ മുന്നിര്ത്തി 1994ലാണ് സാമ്പത്തികശാസ്ത്രത്തിനുള്ള നൊബേല് ലഭിച്ചത്. ഈ സിദ്ധാന്തത്തെ അധികരിച്ച് 23 ഗവേഷണപ്രബന്ധങ്ങള് ഇദ്ദേഹം തയ്യാറാക്കിയിട്ടുണ്ട്. ഗണിതശാസ്ത്രത്തിലെ ഉന്നത ബഹുമതിയായ ആബേല് പുരസ്കാരവും കഴിഞ്ഞയാഴ്ച അദ്ദേഹത്തെ തേടിയെത്തി.
നാഷിന്റെ ജീവിതത്തെ ആസ്പദമാക്കിയെടുത്ത ‘എ ബ്യൂട്ടിഫുള് മൈന്ഡ്’ എന്ന ചിത്രം ഓസ്കര് നേടിയിരുന്നു. റസ്സല് ക്രോയാണ് ചിത്രത്തില് അദ്ദേഹത്തെ അവതരിപ്പിച്ചത്.
11928 ജൂണ് 13ന് വെര്ജീനിയയിലെ ബ്ലൂഫീല്ഡില് ജനിച്ച നാഷ് ന്യൂജഴ്സിയിലെ പ്രിന്സ്ടൗണിലാണ് താമസിച്ചിരുന്നത്. കാര്ണജി മെലണ് സര്വകലാശാലയില് നിന്ന് ഗണിതശാസ്ത്രബിരുദവും പ്രിന്സ്ടണ് സര്വകലാശാലയില് നിന്ന് ഗവേഷണബിരുദവും നേടിയ ഇദ്ദേഹം തുടര്ന്ന് പ്രിന്സ്ടണില് തന്നെ ഗണിതശാസ്ത്രവിഭാഗം ഇന്സ്ട്രക്ടറായി. ഗണിതശാസ്ത്രത്തില് ഗെയിം തിയറിയിലൂടെ വിപ്ലവം സൃഷ്ടിച്ച നാഷ് ആള്ജിബ്രാ ജ്യോമെട്രിയിലും ഡിഫറന്ഷ്യന് ജ്യോമെട്രിയിലും തന്റേതായ സംഭാവനകള് നല്കി.
1959ല് സ്കിസോഫ്രീനിയ ബാധിച്ച നാഷ് ഒന്പതുവര്ഷത്തോളം വിവിധ മാനസികാരോഗ്യകേന്ദ്രങ്ങളില് ചികിത്സയ്ക്ക് വിധേയമായിട്ടുണ്ട്. സില്വിയ നാസര് എഴുതിയ ഇദ്ദേഹത്തിന്റെ ജീവചരിത്രമായ ‘എ ബ്യൂട്ടിഫുള് മൈന്ഡ്’ 2001ല് അതേപേരില് സിനിമയായി.
നൊബേല് പുരസ്കാരത്തിനുപുറമേ, ജോണ് ഫൊണ് ന്യൂമാന് തിയറി പുരസ്കാരം (1978), ലിറോയ് വി. സ്റ്റീലെ പുരസ്കാരം (1999) എന്നിവയും ലഭിച്ചിട്ടുണ്ട്. കാര്ണജി മെലണ് സര്വകലാശാല, നേപ്പിള്സ് സര്വകലാശാല, ഹോങ്കോങ് സിറ്റി സര്വകലാശാല തുടങ്ങിയ ലോകോത്തരസ്ഥാപനങ്ങള് ഇദ്ദേഹത്തെ ഡോക്ടറേറ്റ് നല്കി ആദരിച്ചിട്ടുണ്ട്.
