കൊച്ചി: വിവിധ സ്ഥലങ്ങളില്‍ നിന്നും ബൈക്കുകള്‍ മോഷ്ടിച്ച് ബൈക്കുകളില്‍ കറങ്ങി നടന്നിരുന്ന 2 അംഗ സംഘത്തെ അറസ്റ്റ് ചെയ്തു. കുറ്റിയാന്‍ചാല്‍ കരയില്‍ മോളേക്കുടിയില്‍ കുഞ്ഞാട് എന്ന് വിളിക്കുന്ന കുര്യാക്കോസ് (49), ഇടുക്കി കല്ലാര്‍ കരയില്‍ ഇടയ്‌ക്കാട്ട് രാമചന്ദ്രന്‍ (48) എന്നിവരെയാണ് വാഹനപരിശോധനയ്‌ക്കിടെ മോഷണ മോട്ടോര്‍ സൈക്കിള്‍ സഹിതം അറസ്റ്റ് ചെയ്തത്.
ഷൊര്‍ണ്ണുര്‍ റെയില്‍വേ സ്റ്റേഷനില്‍ നിന്നും ബൈക്കുമായിട്ടാണ് പ്രതികളെ പിടികൂടിയത്. തൃശൂര്‍ മെഡിക്കല്‍ കോളേജ് കോമ്പൗണ്ടില്‍ നിന്നും രണ്ടു മാസം മുമ്പ് കെഎല്‍ 8 ഡബ്ല്യു 1436 എന്ന ബൈക്കും, ഒരു മാസം മുമ്പ് തൃശൂര്‍ റെയില്‍വേ സ്റ്റേഷനില്‍ നിന്നും കെഎല്‍ 8 എസ് 5736 എന്ന നമ്പര്‍ ബൈക്കും പ്രതികള്‍ മോഷ്ടിച്ചതായി ചോദ്യം ചെയ്യലില്‍ സമ്മതിച്ചതായി പോലീസ് പറഞ്ഞു.
കുര്യാക്കോസ് ആദ്യ ഭാര്യയെ ഉപേക്ഷിച്ച് ആമ്പലൂരുള്ള രണ്ട് കുട്ടികളുള്ള സ്ത്രീയെ കൂടെ താമസിപ്പിച്ചിരുന്നതും ആസ്ത്രീയുടെ പെണ്‍കുട്ടിയെ ലൈംഗീകമായി പീഡിപ്പിച്ചതിന് തലയോലപറമ്പ് പോലീസ് സ്റ്റേഷനില്‍ കേസ്സും, കുട്ടിയുടെ അമ്മയെ ദേഹോപദ്രവം ഏല്‍പ്പിച്ചതിന് പേരാംമംഗലം പോലീസ് സ്റ്റേഷനില്‍ വധശ്രമത്തിന് കേസും നിലവിലുണ്ട്. രാമചന്ദ്രന്‍ അടിമാലിയില്‍ കള്ളത്തടി വെട്ടിയതിന് ഫോറസ്റ്റ് കേസ്സിലെ പ്രതിയാണ്. പ്രതികള്‍ മോഷണം ചെയ്‌തെടുത്ത മൂന്ന് ബൈക്കുകളും പോലീസ് കണ്ടെടുത്തു.
സിഐ വിശാല്‍ ജോണ്‍സന്റെ നിര്‍ദ്ദേശ പ്രകാരം രൂപീകരിച്ച അന്വേഷണ സംഘത്തില്‍ ജൂനിയര്‍ എസ്‌ഐ ടി.ഡി.പ്രജീഷ്, എഎസ്‌ഐ ജോര്‍ജ്ജ് ജോസഫ്, എസ്‌സിപിഒ മാരായ രാജേഷ്, അനില്‍.കെ, സലീം, ചന്ദ്രബോസ് എന്നിവരും ഉണ്ടായിരുന്നു. പ്രതികളെ കസ്റ്റഡിയില്‍ വാങ്ങി കൂടുതല്‍ അന്വേഷണം നടത്തുന്നുണ്ടെന്ന് സിഐ വിശാല്‍ ജോണ്‍സണ്‍ അറിയിച്ചു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.
