ലണ്ടന്‍: ‘വെളുത്ത വിധവ’ എന്നറിയപ്പെടുന്ന ലോകത്തിലെ ഏറ്റവും കുപ്രസിദ്ധ വനിതാ ഭീകരവാദിയായി അറിയപ്പെടുന്ന സാമന്ത ലൂത്ത്‌വൈറ്റ്(32) വിവിധ ആക്രമണങ്ങളില്‍ 400 ഓളം പേരെ കൊന്നതായി വെളിപ്പെടുത്തല്‍. ഭീകരാക്രമണങ്ങള്‍, ചാവേര്‍ ആക്രമണങ്ങള്‍, കാര്‍ ബോംബാക്രമണം എന്നിങ്ങനെ സൊമാലിയയിലും കെനിയയിലുമായി നടത്തിയതായിട്ടാണ് മാധ്യമ റിപ്പോര്‍ട്ടുകള്‍.
ഔദ്യോഗിക സുരക്ഷാറിപ്പോര്‍ട്ടുകള്‍ അനുസരിച്ച് നാലുകുട്ടികളുടെ അമ്മയായ ഇവര്‍ 400 പേരെ വധിച്ചതായിട്ടാണ് വെളിപ്പെടുത്തല്‍. സൊമാലിയ കേന്ദ്രമാക്കിയുള്ള ഭീകരസംഘടനയായ അല്‍ ഷബാബിന്റെ പ്രധാനകണ്ണിയാണിവര്‍. കെനിയ യൂണിവേഴ്‌സിറ്റിയില്‍ 148 പേര്‍ മരിച്ച കഴിഞ്ഞമാസം നടന്ന ഭീകരാക്രമണത്തിന്റെ ഉത്തരവാദി ഇവരാണെന്നാണ് വിശ്വസിക്കപ്പെടുന്നത്.
അല്‍ഷബാബിന്റെ തലവന്‍ അഹമ്മദ് ഉമ്മറിന്‍ വലംകയ്യാണ് സാമന്ത ലൂത്ത്‌വൈറ്റ് എന്നാണ് പറയപ്പെടുന്നത്. യുവാക്കളെ ഭീകരസംഘടനയിലേക്ക് റിക്രൂട്ട് ചെയ്യുന്നത് ഇവരാണെന്നാണ് റിപ്പോര്‍ട്ട്.ഇവരുടെ വലയത്തില്‍പ്പെട്ട ആണ്‍കുട്ടികളെ ഉപയോഗിച്ചാണ് ചാവേര്‍ ആക്രമണങ്ങള്‍ നടത്തിയത്.
സാമന്ത ലൂത്ത്‌വൈറ്റിന്റെ പിതാവ് വടക്കന്‍ അയര്‍ലാന്‍ഡില്‍ പട്ടാളക്കാരനായിരുന്നു. 2005ല്‍ ലണ്ടനില്‍ ചാവേര്‍ ആക്രമണം നടത്തിയ ജെര്‍മൈന്‍ ലിന്‍ഡ്‌സേയാണ് സാമന്തയുടെ ഭര്‍ത്താവ്. അതിന് ശേഷം 52 പേരുടെ മരണത്തിനുകാരണമായ ആക്രമണം നയിച്ചത് ഇവരായിരുന്നു.
ഭീകരാക്രമണത്തിനുശേഷം ബ്രിട്ടനില്‍നിന്നും രക്ഷപ്പെട്ട സാമന്ത 2011ല്‍ കെനിയയിലെ മൊംബാസയിലെ ഷോപ്പിംഗ് സെന്ററില്‍ നടന്ന ബോംബ് സ്‌ഫോടനങ്ങളിലൂടെയാണ് വീണ്ടും ശ്രദ്ധിക്കപ്പെടുന്നത്.
കെനിയയിലും സൊമാലിയയിലുമായി സഞ്ചരിച്ചിരുന്ന സാമന്ത അല്‍ ഷബാബ് തീവ്രവാദി സംഘടനയുടെ മുതിര്‍ന്ന കമാന്‍ഡറായിരുന്നു. അല്‍ ഷബാബാണ് നെയ്‌റോബിയിലെ ഷോപ്പിംഗ് മാളില്‍ കഴിഞ്ഞ സപ്തംബറില്‍ ആക്രമണം നടത്തിയത്. അന്ന് 68 പേര്‍ മരിച്ച തീവ്രവാദി ആക്രമണം ആസൂത്രണം ചെയ്തവരില്‍ ഒരാള്‍ സാമന്തയായിരുന്നു.
നെയ്‌റോബി ഷോപ്പിംഗ് മാള്‍ ആക്രമണത്തിന് ശേഷമാണ് ഇന്റര്‍പോള്‍ സാമന്തയെ ലോകത്തിലെ ഏറ്റവും കുപ്രസിദ്ധയായ ഭീകരവാദിയായി വിശേഷിപ്പിച്ചത്. കഴിഞ്ഞ മാസം ഇസ്ലാമിക് തീവ്രവാദി സംഘടനയായ ഐസിസില്‍ സാമന്ത ചേര്‍ന്നതായി റിപ്പോര്‍ട്ടുകളുണ്ടായിരുന്നു. ഇവരെ പിടിക്കാന്‍ 200 രാജ്യങ്ങളില്‍ ഇന്റര്‍പോള്‍ വലവീശിയിട്ടുണ്ട്.
