ഉലന്‍ ബാറ്റര്‍: മംഗോളിയയ്ക്ക് ഭാരതത്തിന്റെ ധനസഹായം. 100 കോടി ഡോളറിന്റെ സഹായമാണ് ഭാരതം വാഗ്ദാനം ചെയ്തിരിക്കുന്നത്. മംഗോളിയയുടെ സാമ്പത്തിക സ്ഥിതിയും അടിസ്ഥാനസൗകര്യങ്ങളും വര്‍ദ്ധിപ്പിക്കുന്നതിനാണ് സഹായമെന്ന് പ്രധാനമന്ത്രി നരേന്ദ്ര മോദി വ്യക്തമാക്കി. മംഗോളിയന്‍ സന്ദര്‍ശനത്തിനിടെ പാര്‍ലമെന്റിനെ അഭിസംബോധന ചെയ്യുകയായിരുന്നു അദ്ദേഹം.
നൂറ്റിയിരുപത്തഞ്ച് കോടി ജനതയുടെ ആത്മീയ സൗഹൃദവുമായാണ് താനിവിടെ എത്തിയിരിക്കുന്നതെന്ന് പറഞ്ഞ പ്രധാനമന്ത്രി മംഗോളിയ നല്‍കിയ ഊഷ്മള സ്വീകരണത്തിന് നന്ദി പറഞ്ഞു. രണ്ടായിരം വര്‍ഷങ്ങള്‍ക്ക് മുന്‍പ് ഭാരതത്തില്‍ നിന്നും ബുദ്ധമത പ്രചരണത്തിനായി ഭാരതീയര്‍ മംഗോളിയയിലെത്തിയതും ആദ്ധ്യാമിക ജ്ഞാന സമ്പാദനത്തിനായി മംഗോളിയയില്‍ നിന്ന് ആളുകള്‍ ഭാരതത്തിലെത്തിയതും മോദി പ്രസംഗത്തില്‍ ചൂണ്ടിക്കാട്ടി.
യു എന്നിലും മറ്റ് അന്താരാഷ്‌ട്ര വേദികളിലും മംഗോളിയ ഭാരതത്തിനൊപ്പം നില്‍ക്കുന്നത് മോദി നന്ദിയോടെ സ്മരിച്ചു. ലോകത്തിന് അവസരം നല്‍കുന്ന സുഹൃത്തുക്കളെ സഹായിക്കാന്‍ സന്മനസുള്ള രാഷ്‌ട്രമാണ് ഭാരതം. ശ്രീബുദ്ധന്റെയും മഹാത്മാഗാന്ധിയുടെയും നാടിന്റെ അടിസ്ഥാന സ്വഭാവമാണത്. വസുധൈവ കുടുംബകം എന്ന പൗരാണിക സങ്കല്‍പ്പത്തിന്റെ ഭാഗമാണത്- പ്രധാനമന്ത്രി വ്യക്തമാക്കി.
മംഗോളിയയിലെ എബി വാജ്‌പേയിയുടെ പേരിലുള്ള വിവര വിനിമയ സാങ്കേതിക കേന്ദ്രത്തിന്റെ നവീകരണത്തിന് തറക്കല്ലിടുന്നതായി പ്രഖ്യാപിച്ച പ്രധാനമന്ത്രി അര്‍ബുദ ചികിത്സയ്‌ക്കായുള്ള ആധുനിക ഉപകരണമായ ഭാഭാട്രോണും മംഗോളിയയ്ക്ക് സമ്മാനിച്ചു.
മംഗോളിയ-ഭാരത ബന്ധം മാനവികതയുടെ അടയാളമായി മാറുമെന്ന് പ്രഖ്യാപിച്ച പ്രധാനമന്ത്രി സര്‍വേപി സുഖിന സന്തു എന്ന സംസ്‌കൃത ശ്ലോകം ചൊല്ലിയാണ് പാര്‍ലമെന്റ് പ്രസംഗം അവസാനിപ്പിച്ചത്.
തുടര്‍ന്ന് മോദി മംഗോളിയന്‍ പ്രധാനമന്ത്രി ചിമിഡ് സെയ്ഖാന്‍ബിലെഗുമായി കൂടിക്കാഴ്ച നടത്തി. ഏഷ്യ- പസഫിക് പ്രദേശത്ത് സമാധാനവും സ്ഥിരതയും ഉറപ്പാക്കാന്‍ ഭാരതവും മംഗോളിയയും ഒന്നിച്ചു പ്രവര്‍ത്തിക്കുമെന്നു പ്രധാനമന്ത്രി പറഞ്ഞു.
പ്രതിരോധം, സൈബര്‍ സുരക്ഷ, കൃഷി, പാരമ്പര്യേതര ഊര്‍ജ്ജം, ആരോഗ്യം എന്നീ മേഖലകളില്‍ പതിനാല് ഉടമ്പടികളില്‍ ഇരുരാജ്യങ്ങളും ഒപ്പുവച്ചു. ഇതാദ്യമായാണ് ഒരു ഭാരത പ്രധാനമന്ത്രി മംഗോളിയ സന്ദര്‍ശിക്കുന്നത്. മംഗോളിയ സന്ദര്‍ശിക്കുന്ന ആദ്യ പ്രധാനമന്ത്രിയായതില്‍ വളരെ സന്തോഷമുണ്ടെന്നും മോദി കൂട്ടിച്ചേര്‍ത്തു. രണ്ടു ദിവസത്തെ സന്ദര്‍ശനത്തിനായാണു മോദി മംഗോളിയയിലെത്തിയത്.
