സംഭവം 19 വര്ഷം പഴക്കമുള്ളതാണ്. ഒരു നാടിനെത്തന്നെ വിറപ്പിച്ച ചന്ദനക്കൊള്ളക്കാരന് വീരപ്പനാണ് കഥയിലെ നായകന്. തമിഴിലെ പ്രശസ്തമായ നക്കീരന് മാസികയുടെ എഡിറ്റര് നക്കീരന് ആര് ഗോപാലന് തോന്നി വനംകൊള്ളക്കാരന് വീരപ്പനുമായി മുഖാമുഖം അഭിമുഖം നടത്തണമെന്ന്.
തോന്നുകമാത്രമല്ല അന്നാട്ടുകാര് ഭയത്തോടെ മാത്രം നോക്കിക്കണ്ട വീരപ്പനുമായി നേര്ക്കുനേര് അഭിമുഖം നടത്തുകയും ചെയ്തു. ഈ അഭിമുഖമാവട്ടെ 1996 ഏപ്രില് ഏഴിന് സണ് ടിവി സംപ്രേഷണം ചെയ്യുകയുമുണ്ടായി. കര്ണാടക, കേരള, തമിഴ്നാട് സര്ക്കാരുകളേയും സൈന്യത്തെപ്പോലും അഭിമുഖത്തിനിടയില് വെല്ലുവിളിക്കാനും വീരപ്പന് മറന്നില്ല. അന്ന് തമിഴ്നാട് ഭരിച്ചുകൊണ്ടിരുന്നത് എഐഎഡിഎംകെയായിരുന്നു. അഭിമുഖത്തിനിടയില്, തമിഴില് തിളങ്ങി നിന്നിരുന്ന നടി സുകന്യയേയും വീരപ്പന് വെറുതെവിട്ടില്ല.
സുകന്യയേയും അപകീര്ത്തിപ്പെടുത്തുന്ന തരത്തില് പരാമര്ശം നടത്തി വീരപ്പന്. സണ് ടിവി ആകട്ടെ അരമണിക്കൂര് വീതമുള്ള എപ്പിസോഡുകളായി അഭിമുഖം സംപ്രേക്ഷണം ചെയ്യുകയും ചെയ്തു. തന്നെപ്പറ്റി മോശം പരാമര്ശം നടത്തിയ വീരപ്പനെതിരെയും അഭിമുഖം നടത്തിയ നക്കീരന് ഗോപാലനെതിരെയും സംപ്രേക്ഷണം ചെയ്ത സണ് ടിവിയ്ക്കെതിരെയും സുകന്യ മദ്രാസ് ഹൈക്കോടതിയെ സമീപിച്ചു.
കേസ് അതിവേഗ കോടതിയുടെ പരിഗണനയ്ക്ക് വിടുകയും ചെയ്തു. പേര് അതിവേഗ കോടതിയെന്നാണെങ്കിലും 15 വര്ഷത്തോളം ഒരു തീരുമാനവും ആകാതെ നീണ്ടു. പിന്നെ 2013 ലാണ് കോടതി നടപടികള്ക്ക് ഒരു അനക്കം വച്ചത്. ഇതിനിടയില് സുകന്യക്കെതിരെ പരാമര്ശം നടത്തിയ വീരപ്പന് 2004 ല് ഏറ്റുമുട്ടലില് കൊല്ലപ്പെട്ടു. എന്നാല് ചാനലില് വന്ന അഭിമുഖത്തിന് സമാധാനം പറയേണ്ട ആവശ്യമില്ലെന്ന് നക്കീരന് ഗോപാലന്റെ അഭിഭാഷകര് കോടതിയെ ബോധിപ്പിച്ചു.
അഭിമുഖത്തിന്റെ വീഡിയോ ഫൂട്ടേജും സമര്പ്പിച്ചു. തനിക്കെതിരെ അപകീര്ത്തികരമായ പരാമര്ശം നടത്തിയതിന് നഷ്ടപരിഹാരം ആവശ്യപ്പെട്ടാണ് സുകന്യ കോടതിയെ സമീപിച്ചത്. കേസില് നക്കീരന് ഗോപാലനെ കുറ്റവിമുക്തനാക്കി. അഭിമുഖം സംപ്രേഷണം ചെയ്ത സണ് ടിവി 10,00,500 രൂപ നഷ്ടപരിഹാരമായി സുകന്യക്ക് നല്കണമെന്ന് അതിവേഗ കോടതി ഉത്തരവിട്ടത് അടുത്തിടെയാണ്.
സമൂഹത്തില് നാലാള് അറിയുന്നവര്ക്കെതിരെ അപകീര്ത്തികരമായ പരാമര്ശമുണ്ടാകുമ്പോള്, വാര്ത്താപ്രാധാന്യം മാത്രം കണക്കിലെടുത്ത് ജനമധ്യത്തില് എത്തിക്കാനുള്ള ത്വരയിലാണ് മാധ്യമങ്ങള്. പിന്നെ വരുന്നതെന്താണോ അപ്പോള് കാണാം എന്ന മട്ടിലാണ് കാര്യങ്ങളുടെ പോക്ക്. എന്നിരുന്നാലും സദുേദ്ദശത്തോടെയല്ലാതെ എന്തുതന്നെ ചെയ്താലും പിന്നീടൊരിക്കല് മറുപടി പറയേണ്ടിവരുമെന്ന് ഓര്ത്താല് നന്ന്.
