കൊല്ലം: ഉന്നത രാഷ്ട്രീയ സ്വാധീനം ഉപയോഗിച്ചും ഉദ്യോഗസ്ഥപ്രമുഖരുടെ ഒത്താശയോടെയും ജില്ലയില് കശുവണ്ടിവ്യവസായികളെ കബളിപ്പിച്ചു നടത്തിയ വന്തട്ടിപ്പിന്റെ വിവരങ്ങള് വെളിച്ചത്തുവന്നതോടെ തട്ടിപ്പിന് ഇരകളായ കൂടുതല് പേര് പരാതിയുമായി രംഗത്ത്.
തട്ടിപ്പിന് നേതൃത്വം നല്കിയ അടൂര് മണക്കാല പുതിയവിള സിന്ധുഭവനില് ശരത്ചന്ദ്രന്, ഭാര്യ ലക്ഷ്മിഭാസ്കരന്, ഭാര്യാപിതാവ് കായംകുളം സ്നേഹാലയത്തില് വേലഞ്ചിറ ഭാസ്കരന് എന്നിവര്ക്ക് എതിരെ തെളിവുകള് സഹിതം പരാതി നല്കിയിട്ടും നടപടിയില്ലാത്തതില് പ്രതിഷേധിച്ച് ശക്തമായ പ്രക്ഷോഭ പരിപാടികള്ക്ക് രൂപം നല്കിയതായി തട്ടിപ്പിന് ഇരകളായവര് ചേര്ന്ന് രൂപീകരിച്ച കാഷ്യൂ പ്രോസസേഴ്സ് ഫോറം ആക്ഷന് കൗണ്സില് ഭാരവാഹികള് അറിയിച്ചു.
കൊല്ലം മോര് അബു കാഷ്യൂസ് ഉടമ തോമസ് വൈദ്യന് എന്നയാള് ഉള്പ്പെടെ നിരവധി പേരാണ് തട്ടിപ്പു സംഘത്തെക്കുറിച്ചുള്ള വാര്ത്തകള് പുറത്തായതോടെ പരാതിയുമായി എത്തിയിരിക്കുന്നത്. തോട്ടണ്ടി ഇറക്കുമതി വാഗ്ദാനം വിശ്വസിച്ച് തട്ടിപ്പുസംഘത്തിന്റെ കെണിയില് വീണ തോമസ് വൈദ്യനു നഷ്ടമായത് 25 ലക്ഷം രൂപയാണ്.
ഇതിനു പുറമേയാണ് ഇന്ത്യന് ഓവര്സീസ് ബാങ്ക് അടൂര് ശാഖാ മാനേജരെ കബളിപ്പിച്ച് വായ്പാ തട്ടിപ്പിലൂടെ സംഘം 30 കോടിയോളം രൂപ കൈക്കലാക്കിയ സംഭവവും പുറത്തുവന്നത്.സംഭവത്തെ തുടര്ന്ന് മാനേജര് സസ്പെന്ഷനിലാകുകയും, അന്വേഷണം സിബിഐ ഏറ്റെടുക്കുകയും ചെയ്തു.
മന്ത്രിതലത്തില് ഉള്പ്പെടെ പ്രമുഖ രാഷ്ട്രീയ നേതാക്കളുമായുള്ള അടുപ്പം വിനിയോഗിച്ച് ആസൂത്രിതമായും വ്യാജരേഖകള് ചമച്ചും നടത്തിയ തട്ടിപ്പിനെക്കുറിച്ച് പോലീസിലും വിവിധ കോടതികളിലും പരാതികള് നല്കുകയും മാധ്യമങ്ങളിലൂടെ വാര്ത്ത പുറത്തുവരികയും ചെയ്തതോടെ സംഭവത്തിലെ മുഖ്യപ്രതിയായ ശരത്ചന്ദ്രന് പരാതിക്കാര്ക്ക് എതിരെ വ്യാജ ആരോപണങ്ങള് ഉന്നയിച്ച് സ്വന്തം ഭാര്യ മുഖേന പോലീസില് പരാതി നല്കിയതായും ആക്ഷന് കൗണ്സില് ഭാരവാഹികള് പറഞ്ഞു. പ്രതികളുടെ രാഷ്ട്രീയസ്വാധീനത്തിന് വഴങ്ങി കൊല്ലം ഈസ്റ്റ് പോലീസ് അറസ്റ്റ് ഉള്പ്പെടെയുള്ള തുടര്നടപടികള്ക്കു മുതിരാതെ പരാതിക്കാരെ സ്റ്റേഷനില് വിളിച്ചുവരുത്തി മാനസികമായി പീഡിപ്പിക്കുന്നതായാണ് ആക്ഷേപം.
സന്ധ്യ കാഷ്യു കമ്പനി എന്ന വ്യവസായ സ്ഥാപനത്തിന്റെ പേരില് കൊല്ലത്തെ പ്രമുഖ കശുവണ്ടി വ്യവസായികളുമായി പരിചയം സ്ഥാപിച്ച ശരത്ചന്ദ്രനും ഭാര്യാപിതാവായ വേലഞ്ചിറ ഭാസ്കരനും ചേര്ന്ന് അഫ്രിക്കന് തോട്ടണ്ടി ഇറക്കുമതി ചെയ്ത് കുറഞ്ഞ നിരക്കില് നല്കാമെന്ന് വാഗ്ദാനം നല്കി അഡ്വാന്സ് കൈപ്പറ്റിയ ശേഷം വ്യവസായികളെ കബളിപ്പിച്ചാണ് അമ്പതു കോടിയോളം രൂപയുടെ തട്ടിയത്.
