ജോഷിയുടെ സംവിധാനത്തില്‍ മോഹന്ലാലും അമലാ പോളും ജോഡികളായെത്തുന്ന റൊമാന്റിക്‌ ത്രില്ലര്‍ ലൈലാ ഓ ലൈലയിലെ ഓഡിയോ റിലീസ് മോഹന്ലാലും സംവിധായകന്‍ എം.എല്‍ വിജയും ചേര്‍ന്ന് നിര്‍വഹിച്ചു.
കൊച്ചിയിലെ ട്രാവന്‍കൂര്‍കോര്‍ട്ട് ഹോട്ടലില്‍ നടന്ന ചടങ്ങില്‍ സിനിമയിലെ മിക്ക അണിയറ പ്രവര്‍ത്തകരും പങ്കെടുത്തു. നാലു പാട്ടുകളാണ് ചിത്രത്തിലുള്ളത്. ഇതില്‍ രണ്ടു പാട്ടുകളുടെ വിഡിയോയും ചടങ്ങില്‍ പ്രദര്‍ശിപ്പിച്ചു. സംവിധായകന്‍ ജോഷി, സിയാദ് കോക്കര്‍, നിര്‍മാതാവ് പ്രീത നായര്‍, അന്ന കത്രീന, പ്രീതി ബെല്ല തുടങ്ങിയവര്‍ പങ്കെടുത്തു.
ഏറ്റവും മികച്ച പ്രൊഡക്ട് ഉണ്ടാക്കാനായിരുന്നു ശ്രമം. പേരിനുതന്നെ ഒരു പ്രത്യേകതയുണ്ട്. ഒരു മലയാള സിനിമയില്‍ നിന്നു പ്രതീക്ഷിക്കാവുന്നതിലേറെ ലൈലാ ഓ ലൈലയില്‍ നിന്നു പ്രതീക്ഷിക്കാം. സംവിധായകന്‍ ജോഷി സാറിനും നായിക അമല പോളിനും പ്രത്യേക നന്ദി പറയുന്നു. മികച്ച പാട്ടും പശ്ചാത്തല സംഗീതവുമാണ് ഗോപീസുന്ദര്‍ ഒരുക്കിയിരിക്കുന്നത്. സിനിമയെ പ്രേക്ഷകര്‍ സ്വീകരിക്കുമെന്നാണു പ്രതീക്ഷയെന്നും ഓഡിയോ റിലീസിംഗിന് ശേഷം മോഹന്‍ലാല്‍ പറഞ്ഞു.
ഇത്രകണ്ട് ആസ്വദിച്ച് അഭിനയിച്ച സിനിമ മറ്റൊന്നില്ലെന്ന് അമല പറഞ്ഞു. ടൈം മിഷിന്‍ ഉണ്ടായിരുന്നെങ്കില്‍ ചിത്രീകരണത്തിന്റെ ആദ്യ ദിവസത്തിലേക്ക് തിരിച്ചു പോയിരുന്നു. ഇഷ്ടപ്പെട്ട നടന്റെയും സംവിധായകന്റെയും കൂടെ വീണ്ടും അഭിനയിക്കാന്‍ കഴിഞ്ഞതില്‍ സന്തോഷമുണ്ടെന്നും അമല പറഞ്ഞു.
സന്തോഷ്‌ കോട്ടായി, ബിജു ആന്റണി, പ്രീത നായര്‍ തുടങ്ങിയവരാണ്‌ ഈ ചിത്രം നിര്‍മ്മിക്കുന്നത്‌. അമലാ പോളാണ്‌ നായിക. തമിഴ്‌ നടന്‍ സത്യരാജ്‌, ജോയ്‌മാത്യു, രമ്യനമ്പീശന്‍, രാഹുല്‍ ദേവ്‌ എന്നിവരാണ്‌ മറ്റു താരങ്ങള്‍. ബോളിവുഡില്‍ നിരവധി ഹിറ്റുകളൊരുക്കിയ സുരേഷ്‌ നായരുടെതാണ്‌ കഥ. സംഗീതം ഗോപി സുന്ദര്‍. ലോകനാഥനാണ്‌ ഛായാഗ്രഹണം.
