കൊച്ചി: മന്ത്രി ഇബ്രാഹിംകുഞ്ഞിന്റെ കളമശ്ശേരി പത്തടിപ്പാലത്തുള്ള ഓഫീസിലേക്ക് യുവമോര്ച്ച മാര്ച്ച് നടത്തി. മാര്ച്ച് ബിജെപി ജില്ലാ പ്രസിഡന്റ് അഡ്വ. പി.ജെ. തോമസ് ഉദ്ഘാടനം ചെയ്തു.
തുടര്ന്ന് ബാരിക്കേഡ് മറികടക്കാന് ശ്രമിച്ച പ്രവര്ത്തകര്ക്കെതിരെ പോലീസ് ജലപീരങ്കി പ്രയോഗിച്ചു. യുവമോര്ച്ച ജില്ലാ പ്രസിഡന്റ് ശ്രീകാന്ത് ശ്രീധരന് ഉള്പ്പെടെ നിരവധിപേര്ക്ക് ഗുരുതര പരിക്കേറ്റു. ഇവരെ കളമശ്ശേരി മെഡിക്കല് കോളേജില് പ്രവേശിപ്പിച്ചു.
യുഡിഎഫ് അഴിമതിക്കാരുടെ സങ്കേതമാണ്. ജനദ്രോഹം നടത്തുന്ന യുഡിഎഫ് സര്ക്കാരിനെതിരെ യുവമോര്ച്ചയും ബിജെപിയും ശക്തമായ സമരപരിപാടിയുമായി മുന്നോട്ടുപോകുമെന്ന് മാര്ച്ച് ഉദ്ഘാടനം ചെയ്തുകൊണ്ട് ബിജെപി ജില്ലാ പ്രസിഡന്റ് അഡ്വ. പി.ജെ. തോമസ് പറഞ്ഞു.
യുവമോര്ച്ച കളമശ്ശേരി നിയോജകമണ്ഡലം പ്രസിഡന്റ് എബിന്രാജ് അധ്യക്ഷതവഹിച്ചു. യുവമോര്ച്ച ജില്ലാ പ്രസിഡന്റ് ശ്രീകാന്ത് ശ്രീധരന്, ജില്ലാ വൈസ് പ്രസിഡന്റുമാരായ ദീപക് അകത്തൂട്ട്, കിരണ് സോമന്, സിജേഷ്, വിജയകുമാര്, സംഗീത്, സഞ്ജിത്ത്, റോഷന്, സുഷാദ്, അഖില്, പ്രവീണ് പ്രകാശ്, തങ്കപ്പന്, സുന്ദരന്, ജയപ്പന്, ബിജെപി മണ്ഡലം പ്രസിഡന്റ് ഉദയകുമാര്, ജനറല് സെക്രട്ടറി സുനില്കുമാര് തുടങ്ങിയവര് നേതൃത്വംനല്കി.
യുവമോര്ച്ച ജില്ലാ പ്രസിഡന്റ് ശ്രീകാന്ത് ശ്രീധരന്റെ ഇടതു ചെവിക്കും തലയ്ക്കും പരിക്കുപറ്റി. ശക്തമായ ജലപ്രയോഗത്തില് റോഡില് തെറിച്ചുവീണ് ബോധരഹിതനായ ഇദ്ദേഹത്തെ പ്രവര്ത്തകര് കളമശ്ശേരി മെഡിക്കല് കോളേജില് പ്രവേശിപ്പിച്ചു. പരിശോധനയില് ഇദ്ദേഹത്തിന്റെ ഇടത് ചെവിക്കും ഇടത് കൈക്കും പരിക്കുണ്ടെന്നും ചെവിയുടെ കേള്വിശക്തിക്ക് കോട്ടംതട്ടിയിട്ടുണ്ടെന്നും ഡോക്ടര്മാര് പറഞ്ഞു. സംഭവത്തില് യുവമോര്ച്ച ജില്ലാക്കകമ്മിറ്റി പ്രതിഷേധിച്ചു.
