ഹരിപ്പാട്: എക്സൈസ് മൊബൈല് ലാബ് നടത്തിയ പരിശോധനയില് മാരകമായ മയക്കുമരുന്ന് അടങ്ങിയ കള്ള് പിടിച്ചെടുത്തു. കാര്ത്തികപ്പള്ളി റേഞ്ചിലെ നങ്ങ്യാര്കുളങ്ങര ഷാപ്പില് നിന്നുമാണ് വ്യാജക്കള്ള് കണ്ടെടുത്തത്. റേഞ്ചിലെ എക്സൈസ് ഉദ്യോഗസ്ഥര് അറിയാതെയായിരുന്നു പരിശോധന സംഘം എത്തിയത്. വ്യാജക്കള്ള് കണ്ടെത്തിയതിനെ തുടര്ന്ന് റേഞ്ചിലെ ഉദ്യോഗസ്ഥരെ വിളിച്ചു വരുത്തി സംയുക്തമായി സാമ്പിള് ശേഖരിച്ചു. മൊബൈല് പരിശോധനാ ലാബിലെ പരിശോധന ഫലം കോടതി അംഗീകരിക്കാത്തതിനാല് വിദഗ്ധ പരിശോധനയ്ക്കായി സാമ്പിള് തിരുവനന്തപുരം ചീഫ് കെമിക്കല് ലാബില് പരിശോധനയ്ക്കായി അയച്ചു.
രണ്ടുമാസങ്ങള് മുന്പ് കാര്ത്തികപ്പള്ളി റേഞ്ചിലെ അരുണപ്പുറത്തു നിന്ന് എക്സൈസ് കമ്മീഷണറുടെ നേതൃത്വത്തില് ആയിരക്കണക്കിന് ലിറ്റര് വ്യാജക്കള്ള് പിടിച്ചെടുത്തിരുന്നു. എന്നാല് ഇതിന്മേലുള്ള തുടരന്വേഷണം അട്ടിമറിക്കപ്പെട്ടു.
കാര്ത്തികപ്പള്ളി റേഞ്ചില് വ്യാജക്കള്ള് ഉത്പാദനവും വിപണനവും വ്യാപകമാണെന്ന പരാതിയുടെ അടിസ്ഥാനത്തിലായിരുന്നു പരിശോധന. എന്നാല് മൊബൈല് പരിശോധനാ ലാബിന്റെ റിപ്പോര്ട്ടിന് ആധികാരികതയില്ലാത്തത് പരിശോധനയെ ബാധിക്കുന്നുണ്ട്. നാലുമാസം മുന്പ് മൊബൈല് പരിശോധനാ ലാബ് ജില്ലയില് നടത്തിയ പരിശോധനയില് വ്യാപകമായി വ്യാജക്കള്ള് കണ്ടെത്തുകയും ഷാപ്പുകള്ക്ക് എതിരെ നടപടി സ്വീകരിക്കുകയും ചെയ്തു.
എന്നാല് ഇതിനെ ചോദ്യം ചെയ്ത് കോടതിയെ സമീപിച്ച ഷാപ്പുടമകള് അനുകൂല വിധി സമ്പാദിച്ചിരുന്നു. ജില്ലയില് മൊബൈല് പരിശോധനാ ലാബ് പരിശോധന നടത്തി വ്യാജക്കള്ള് കണ്ടെത്തിയിട്ടും ഇതിനെ കുറിച്ച് അറിയില്ലെന്നാണ് ജില്ലയിലെ മുതിര്ന്ന എക്സൈസ് ഉദ്യോഗസ്ഥന്റെ നിലപാട്. കൃത്യമായി പടി ലഭിക്കുന്നതിനാല് വേണ്ട രീതിയിലുള്ള പരിശോധനകള് ഷാപ്പുകളില് നടക്കാത്തതാണ് വ്യാജ കള്ള് വ്യാപകമാകാന് കാരണമെന്ന് ആരോപണമുണ്ട്.
