ഈശ്വരനെ സന്തതസഹചാരിയാക്കാതെ, ഈശ്വരന്റെ ജീവിതത്തിലെ രക്ഷാകവചമാക്കാതെ നിങ്ങള്ക്ക് ഗൃഹസ്ഥാശ്രമത്തിലെ പ്രശ്നങ്ങള്ക്ക് പരിഹാരം കാണാന് കഴിയുകയില്ല. ഈശ്വരന്തന്നെ നിങ്ങള്ക്ക് ഉള്ക്കാഴ്ചയും ധൈര്യവും നിസ്സംഗതയും മനഃശാന്തിയും അക്ഷയമായ ആത്മവീര്യവും നല്കണം. അതുകൊണ്ട് ഈശ്വരനാമത്തെ മുറുകെ പിടിക്കുക.
പതിവായി ധ്യാനം ആചരിക്കുവിന്. പവിത്രീകരിക്കുന്ന ധ്യാനഗംഗയില് സ്നാനം ചെയ്തശേഷം വീണ്ടും മനസ്സിനെ വിഷയവാസനകള്കൊണ്ട് പങ്കിലമാക്കാനും വികാരകലുഷിതമാക്കാനും ഇട നല്കരുത്.
ഈശ്വരന്റെയും ഈശ്വരനാമത്തിന്റെയും മഹത്വത്തെ അധികരിച്ച അമ്മ സംഭാഷണം ഇങ്ങനെ തുടര്ന്നു.
ഈശ്വരനാമത്തിന്റെ അത്യുല്ക്കടമായ ശക്തി നൈസര്ഗികമായി വര്ത്തിക്കുന്നു. ഈശ്വര നാമോപാസകനായിത്തീര്ന്നാല് പിന്നീട് നിങ്ങളുടെ സര്വ്വകര്മ്മങ്ങളും നാമത്തിന്റെ ഈശ്വര സംഗീതത്തില് തരംഗിതമാകണം. നിങ്ങളുടെ സ്വഭാവം ശീലങ്ങള് ജീവിതാദര്ശം പെരുമാറ്റം എല്ലാം കൂടുതല് മേന്മയുള്ളതായി പരിവര്ത്തനം ചെയ്യപ്പെടണം.
എല്ലാ സൃഷ്ടികളുടെയും ആധാരവും അന്തര്ധാരയും ഈശ്വരനാണ്. പ്രപഞ്ചത്തിലെ സര്വ്വവും കാരണം, കാര്യം എന്നീ വിഭാഗങ്ങളില് ഉള്ക്കൊള്ളുന്നവയാണ്. സൃഷ്ടിയിലെ സമസ്തവും അസ്ഥിരതയും പരിണാമ വിധേയവുമാണ്. എന്നാല് ഈശ്വരന് കാര്യകാരണമണ്ഡലങ്ങള്ക്ക് അതീതനാണ്. പ്രകൃതിയുടെ ഗുണങ്ങള്ക്കും അതീതനാണ്. ഈശ്വരന് മാത്രമാണ് സത്യം. ഈശ്വരനാമം നിങ്ങളുടെ അന്തഃസ്സത്തയെ ഈശ്വരസത്തയുമായി ബന്ധിപ്പിക്കുന്നു.
ഈശ്വരനാമത്തിന്റെ തരംഗങ്ങള് നിസ്സീമമായ ആദ്ധ്യാത്മികശക്തിയില് സംപൂരിതമാണ്.
ദൈവദ്യുതശക്തിയുടെ കേന്ദ്രം സ്ഥിതിചെയ്യുന്നത് വളരെ അകലെയാകാം. പക്ഷേ വിട്ടവുമായി ബന്ധം സ്ഥാപിച്ച് കഴിഞ്ഞാല് വൈദ്യുത ശക്തിയുടെ പ്രയോജനം പലരൂപത്തില് എല്ലാവര്ക്കും ലഭിക്കും. അതിനു ചൂടോ തണുപ്പോ പ്രകാശമോ കാറ്റോ, നല്കാന് കഴിയും. അനന്തമായ ശക്തികേന്ദ്രമാണ് ഈശ്വരന്. ഈശ്വരനാമത്തിലൂടെ ആത്മാവിന്റെ ശക്തികേന്ദ്രവുമായി ബന്ധപ്പെട്ട് കഴിഞ്ഞാല് നിങ്ങളുടെ മനസ്സ് പരിശുദ്ധമാകും.
