തുറവൂര്‍: ക്ഷേത്രവികസനത്തിനു തടസം നില്‍ക്കുന്ന ശക്തികളെ ചെറുത്തു തോല്‍പ്പിക്കുമെന്ന് ഹിന്ദുഐക്യവേദി ജില്ലാ സെക്രട്ടറി വിനോദ് ഉമ്പര്‍നാട് പറഞ്ഞു. വളമംഗലം തിരുവെങ്കിടപുരം ശ്രീവെങ്കിടാചലപതി ക്ഷേത്രത്തിന്റെ വികസന പ്രവര്‍ത്തനങ്ങള്‍ക്കു തടസമാകുന്ന റോഡു നിര്‍മാണത്തില്‍ പ്രതിഷേധിച്ച് തുറവൂര്‍ പഞ്ചായത്ത്ഓഫീസിനു മുന്നില്‍ നടത്തിയ കൂട്ടധര്‍ണ ഉദ്ഘാടനം ചെയ്യുകായിരുന്നു അദ്ദേഹം. ഹിന്ദുക്കളുടെ ആരാധനാലയങ്ങള്‍ക്കു നേരെ പ്രത്യക്ഷവും പരോക്ഷവുമായ രീതിയില്‍ പല ആക്രമണങ്ങളും നടത്തുന്നുണ്ട്.
ഇത് ഹിന്ദുമത വിശ്വാസികളെ ഒറ്റപ്പെടുത്താനുള്ള ശ്രമമാണ്. ഇതിനെതിരെ ഹിന്ദുക്കളെ ഒറ്റക്കെട്ടായി അണിനിരത്തി സമരപരിപാടികള്‍ക്ക് നേതൃത്വം നല്‍കുമെന്നും അദ്ദേഹം പറഞ്ഞു. ആര്‍എസ്എസ് ശബരിഗിരിവിഭാഗ് കാര്യവാഹ് എല്‍. പത്മകുമാര്‍ മുഖ്യപ്രഭാഷണം നടത്തി. റോഡു നിര്‍മാണവുമായി ബന്ധപ്പെട്ട് ക്ഷേത്രഭൂമിയില്‍ കാലുകുത്തിയാല്‍ അധികൃതര്‍ക്ക് അതിനു വലിയ വില നല്‍കേണ്ടിവരുമെന്ന് അദ്ദേഹം പറഞ്ഞു. വിഎച്ച്പി വിഭാഗ് ജോയിന്റ് സെക്രട്ടറി കെ. ജയകുമാര്‍, ഹരികുമാര്‍, എന്‍.കെ. വിജയന്‍, സന്തോഷ് എന്നിവര്‍ പ്രസംഗിച്ചു.
