ചെങ്ങന്നൂര്: നഗരമദ്ധ്യത്തില് എല്ഡിഎഫുകാരും കേരള കോണ്ഗ്രസ് മാണി വിഭാഗക്കാരും ഏറ്റുമുട്ടി, മൂന്ന് പേര്ക്ക് പരിക്കേറ്റു. കേരള കോണ്ഗ്രസ് സംസ്ഥാന സെക്രട്ടറിയേറ്റ് അംഗവും, നഗരസഭ കൗണ്സിലറുമായ കല്ലുവരമ്പ് പുതുവനയില് ജോസ് (57), മകനും യൂത്ത് ഫ്രണ്ട് ജില്ലാ സെക്രട്ടറിയുമായ വിപിന് ജോസ് (27), നിയോജക മണ്ഡലം വൈസ് പ്രസിഡന്റ് കോടുകുളഞ്ഞി വാഴോലില് വീട്ടില് തമ്പി (64) എന്നിവര്ക്കാണ് പരിക്കേറ്റത്.
മാര്ച്ച് 13ന് രാവിലെ 11.15ന് എംസി റോഡില് ബഥേല് ജങ്ഷന് സമീപമായിരുന്നു സംഭവം. മാണിക്ക് അഭിവാദ്യം അര്പ്പിച്ചുള്ള കേരള കോണ്ഗ്രസിന്റെ പ്രകടനം ബഥേല് ജംഗ്ഷനില് എത്തിയതോടെ എതിര്ഭാഗത്തുനിന്നും താലൂക്ക് ഓഫീസ് ഉപരോധം കഴിഞ്ഞ് എല്ഡിഎഫ് പ്രവര്ത്തകരും പ്രകടനവുമായി എത്തി. ഇവിടെയുണ്ടായിരുന്ന പോലീസ് ഉദ്യോഗസ്ഥര് മാണി വിഭാഗത്ത ബഥേല് റോഡിലേക്ക് കടത്തിവിട്ടെങ്കിലും എല്ഡിഎഫ് പ്രകടനത്തിനിടയില് നിന്നും പതിനഞ്ചോളം ആളുകള് കൊടികെട്ടിയ കമ്പുമായി മാണി വിഭാഗത്തിന്റെ പ്രകടനത്തിന് നേരെ ഇരച്ചുകയറുകയും ഇവരെ ക്രൂരമായി മര്ദ്ദിക്കുകയുമായിരുന്നു.
സിഐ: ആര്. ബിനുകുമാറിന്റെ നേതൃത്വത്തില് കൂടുതല് പോലീസ് സംഘം സ്ഥലത്തെത്തിയാണ് സ്ഥിതി ശാന്തമാക്കിയത്. അക്രമത്തില് ജോസ് പുതവനയുടെ തലയ്ക്കും വലതു കണ്ണിന് താഴെയും, വിപിന് ജോസിന്റെയും, തമ്പിയുടെയും കൈക്കുമാണ് പരിക്കേറ്റത്. മൂവരെയും ചെങ്ങന്നൂരിലെ സ്വകാര്യ ആശുപത്രിയില് പ്രവേശിപ്പിച്ചു.
