ബീജിങ്ങ്: യുഎന് രക്ഷാസമിതിയില് വലിയ പങ്ക് വഹിക്കാനുള്ള ഭാരതത്തിന്റെയും ബ്രസീലിന്റെയും ആഗ്രഹങ്ങളെ തങ്ങള് ആദരിക്കുന്നുവെന്ന് ചൈന. രണ്ടു രാജ്യങ്ങള്ക്കും സ്ഥിരാംഗത്വം നല്കണമെന്ന ആവശ്യത്തെ പിന്തുണച്ച ചൈനീസ് വക്താവ് ഹുവാ ചുന്യിംഗ് ഇക്കാര്യത്തില് നയതന്ത്ര തലത്തില് അഭിപ്രായ സമന്വയം ഉണ്ടാക്കണമെന്നും പറഞ്ഞു.
ഭാരതത്തിന് സ്ഥിരാംഗത്വം നല്കണമെന്ന ആവശ്യത്തെ ചൈനയും റഷ്യയും അമേരിക്കയും പിന്തുണയ്ക്കുന്നുണ്ട്. ജപ്പാനും സ്ഥിരാംഗത്വം ആവശ്യപ്പെട്ടിട്ടുണ്ട്. എന്നാല് ചൈന ഇതിനെ അനുകൂലിക്കുന്നില്ല.
നല്കരുതെന്ന് പാക്കിസ്ഥാന്
ഇസഌമബാദ്: ഭാരതത്തിന് ഐക്യരാഷ്ട്ര സഭയുടെ രക്ഷാ സമിതിയില് സ്ഥിരാംഗത്വം നല്കരുതെന്ന് അമേരിക്കയോട് പാക്കിസ്ഥാന് ആവശ്യപ്പെട്ടു. കശ്മീര് സംബന്ധിച്ച യുഎന് പ്രമേയം ഭാരതം പാലിച്ചിട്ടില്ല. അതിനാല് അംഗത്വം നല്കരുത്. പ്രധാനമന്ത്രി നവാസ് ഷെരീഫ് അമേരിക്കന് പ്രസിഡന്റ്ബരാക് ഒബാമയോട് പറഞ്ഞു. ഇന്നലെ ഒബാമയുമായി നടത്തിയ കൂടിക്കാഴ്ചയിലാണ് പാക്കിസ്ഥാന് ഈ ആവശ്യം ഉന്നയിച്ചത്.
ഭാരതത്തിന് സ്ഥിരാംഗത്വം നല്കണമെന്ന ആവശ്യത്തെ ചൈന പിന്തുണച്ചിരുന്നു. അമേരിക്കയും ഇതിന് അനുകൂലമാണ്. ഈ സാഹചര്യത്തിലാണ് പാക്കിസ്ഥാന്റെ ആവശ്യം. അടുത്തിടെ ഭാരതത്തില് വീണ്ടും വന്ന സമയത്താണ് ഒബാമ ഭാരതത്തിന് സുരക്ഷാ സമിതിയില് സ്ഥിരംഗത്വം നല്കുന്നതിനെ അനുകൂലിച്ച് വീണ്ടും സംസാരിച്ചത്. ഭാരതത്തില് സ്വാധീനം ചെലുത്തി ഭാരത പാക് ചര്ച്ചകള് പുനരാരംഭിക്കാന് ശ്രമിക്കണമെന്നും ഷെരീഫ് ഒബാമയോട് അഭ്യര്ഥിച്ചു.
