കോട്ടയം: തിരുവിതാംകൂര് ഹിന്ദുധര്മ്മ പരിഷത്തിന്റെ ആഭിമുഖ്യത്തില് 69-ാമത് റാന്നി ഹിന്ദു മഹാസമ്മേളനം 15 മുതല് 22 വരെ റാന്നി പമ്പാ മണല്പ്പുറത്ത് നടക്കും. 15ന് രാവിലെ 10ന് പരിഷത്ത് പ്രസിഡന്റ് പി.എന്.നീലകണ്ഠന് നമ്പൂതിരി ധ്വജാരോഹണം നടത്തും. 2ന് സത്സംഗം ആര്ട്ട് ഓഫ് ലിവിങ് റാന്നി യൂണിറ്റിന്റെ നേതൃത്വത്തില് നടക്കും. വൈകിട്ട് 4.30ന് ഉദ്ഘാടന സമ്മേളനം ആള് ഇന്ത്യാ വീരെശൈവ മഹാസഭാ തമിഴ്നാട്- മൈലം മഠാധിപതി ശിവഗണാനബലായ സ്വാമി ഉദ്ഘാടനം ചെയ്യും. ഹിന്ദു ഐക്യവേദി ജനറല് സെക്രട്ടറി കുമ്മനം രാജശേഖരന് അദ്ധ്യക്ഷത വഹിക്കും. എസ്എന്ഡിപി യോഗ ധ്യാനാചാര്യന് ശിവബോധാനന്ദ സ്വാമി അനുഗ്രഹപ്രഭാഷണം നടത്തും. ആശംസ അര്പ്പിച്ച് രാജു എബ്രഹാം എംഎല്എ, പി.എസ്. നായര്, എന്നിവര് സംസാരിക്കും.
തിങ്കളാഴ്ച നടക്കുന്ന ഭാരതീയ പൈതൃക സമ്മേളനത്തില് വീരശൈവ മഹാസഭ പ്രസിഡന്റ് ടി.പി. കുഞ്ഞുമോന് അദ്ധ്യക്ഷത വഹിക്കും. സ്വാമി വേദാനന്ദ സരസ്വതി ഉദ്ഘാടനം ചെയ്യും. ചൊവ്വാഴ്ച ഭഗവതത്ഗീത സമ്മേളനം അഖില കേരള വിശ്വകര്മ്മ മഹാസഭാ സംസ്ഥാന ജനറല് സെക്രട്ടറി വിജയന് കെ. ഈരേഴ ഉദ്ഘാടനം ചെയ്യും. രാഷ്ട്രീയ സ്വയംസേവക സംഘം വിഭാഗ് കാര്യവാഹ് എന്.ജി. ഉണ്ണികൃഷ്ണന് അദ്ധ്യക്ഷത വഹിക്കും. ബുധനാഴ്ച അയ്യപ്പധര്മ്മ സമ്മേളനം മന്ത്രി വി.എസ്. ശിവകുമാര് ഉദ്ഘാടനം ചെയ്യും. കേരള വെള്ളാള മഹാസഭ പ്രസിഡന്റ് പുനലൂര്മധു അദ്ധ്യക്ഷത വഹിക്കും. പത്തനംതിട്ട ജില്ലാ കളക്ടര് ഹരി കിഷോര് ഗുരുസ്വാമിമാരെ ആദരിക്കും. ചാക്കമാര് മഹാസഭ ജനറല് സെക്രട്ടറി കെ.എന്. രഘുനാഥ് മുഖ്യപ്രഭാഷണം നടത്തും. വ്യാഴാഴ്ച നടക്കുന്ന യുവജന സമ്മേളനം സ്വാമി സത്സ്വരൂപാനന്ദ സരസ്വതി ഉദ്ഘാടനം ചെ യ്യും. വിളക്കിത്തല നായര് സമാജം പ്രസിഡന്റ് അഡ്വ. കെ.ആര്. സുരേന്ദ്രന് അദ്ധ്യക്ഷത വഹിക്കും. വെള്ളിയാഴ്ച നടക്കുന്ന ആചാര്യഅനുസ്മരണ സമ്മേളനം കെപിഎംഎസ് സംസ്ഥാന പ്രസിഡന്റ് ടി.വി. ബാബു ഉദ്ഘാടനം ചെയ്യും. വിശ്വകര്മ്മ സഭ സംസ്ഥാന പ്രസിഡന്റ് അഡ്വ. പി.ആര്. ദേവദാസ് അദ്ധ്യക്ഷത വഹിക്കും. ശനിയാഴ്ച രാവിലെ മതപാഠശാല/ ബാലഗോകുലം വിദ്യാര്ത്ഥികളുടെ മത്സരം നടക്കും. വൈകിട്ട് വനിതാസമ്മേളനം ഡോ. എം. ബീന ഉദ്ഘാടനം ചെയ്യും. സംസ്ഥാന വനിതാ കമ്മീഷനംഗം ഡോ. ജെ. പ്രമീളാദേവി അദ്ധ്യക്ഷതവഹിക്കും. ഞായറാഴ്ച രാവിലെ മതപാഠശാലാ സമ്മേളനം ബാലഗോകുലം സംസ്ഥാന ജനറല്സെക്രട്ടറി പ്രസന്നന് മാസ്റ്റര് ഉദ്ഘാടനം ചെയ്യും. മതപാഠശാല അദ്ധ്യാപക പരിഷത്ത് ജനറല് സെക്രട്ടറി മീനടം ഉണ്ണികൃഷ്ണന് നമ്പൂതിരി അദ്ധ്യക്ഷത വഹിക്കും. സമാപന സമ്മേളനം സ്വാമി ഉദിത് ചൈതന്യ ഉദ്ഘാടനം ചെയ്യും. നായര് സര്വ്വീസ് സൊസൈറ്റി പ്രസിഡന്റ് അഡ്വ. പി.എന്. നരേന്ദ്രനാഥന് നായര് അദ്ധ്യക്ഷത വഹിക്കും. തിരുവിതാംകൂര് ദേവസ്വം കമ്മീഷണര് വേണുഗോപാല് മുഖ്യപ്രഭാഷണം നടത്തും. വൈകിട്ട് 6ന് മാതാ അമൃതാനന്ദമയീമഠം ജനറല് സെക്രട്ടറി സ്വാമി പൂര്ണാമതൃതാനന്ദപുരി നയിക്കുന്ന മഹാസര്വ്വൈശ്വര്യപൂജയും നടക്കും.
വിവിധ ദിവസങ്ങളിലായി നടക്കുന്ന രാത്രി പ്രഭാഷണങ്ങളില് ഡോ. എന്. ഗോപാലകൃഷ്ണന്, കെ.പി. ശശികല ടീച്ചര്, സ്വാമി അയ്യപ്പദാസ്, അഡ്വ. ജയസൂര്യന് പാലാ, സ്വാമി പ്രഭാകരാനന്ദ സരസ്വതി എന്നിവര് പ്രഭാഷണം നടത്തും. ട്രാവന്കൂര് അവയവദാന ഫെഡറേഷന്റെയും പുഷ്പഗിരി മെഡിക്കല് കോളേജിന്റെയും ആഭിമുഖ്യത്തില് തിങ്കളാഴ്ച അവയവദാന ബോധവത്കരണക്ലാസും വ്യാഴാഴ്ച സംസ്ഥാന ഹിന്ദു എക്കണോമിക് ഫോറം പ്രസിഡന്റ് മനോജ് മേലേതില് നയിക്കുന്ന ബോധവത്കരണ ക്ലാസും മലബാര് കാന്സര് കെയര് സൊസൈറ്റി പ്രസിഡന്റ് ഡോ. കൃഷ്ണദാസ് പൈ നയിക്കുന്ന കാന്സര് ബോധവത്കരണ ക്ലാസ് ശനിയാഴ്ചയും നടക്കും. പത്രസമ്മേളനത്തില് പരിഷത്ത് പ്രസിഡന്റ് പി.എന്. നീലകണ്ഠന് നമ്പൂതിരി, സെക്രട്ടറിമാരായ ഇന്ദുലാല്, ശ്രീനി ശാസ്താംകോവില്, കെ.ഐ. ശ്രീധരന്, പി.എന്. സുകുമാരന് നായര്, വി.കെ. ചെല്ലപ്പന് എന്നിവര് പങ്കെടുത്തു.
