160 . വിശേ്വശ്വരീ – വിശ്വത്തിന് ഈശ്വരിയായവള്. വിശ്വത്തെ സൃഷ്ടിക്കുകയും രക്ഷിക്കുകയും സംഹരിക്കുകയും ചെയ്യുന്നവള്. വിശേ്വശ്വരനായ ശിവന്റെ പത്നിയായതുകൊണ്ടും ദേവി വിശേ്വശ്വരിയാണ്.
161 . വീരവന്ദ്യാ – വീരന്മാരാല് വന്ദിക്കപ്പെടുന്നവള്. വീരശബ്ദത്തിന് യുദ്ധവൈദഗ്ധ്യമുള്ളവന്, പരാക്രമശാലി യോഗിനടന്, അഗ്നി, വിഷ്ണു, വീരഭദ്രന് എന്നീ അര്ത്ഥങ്ങളുണ്ട്.
യുദ്ധവിദഗ്ദ്ധരും പരാക്രമശാലികളും പോര്ക്കലിയായ ദേവിയെ വന്ദിച്ചാരാധിച്ച് യുദ്ധങ്ങളില് ജയം നേടുന്നു. യോഗസാധനകളില് ഏര്പ്പെടുന്ന യോഗിമാര്ക്കു കുണ്ഡലിനീരൂപത്തില് ഉള്ളിലുള്ള ദേവിയെ ഉണര്ത്തണമെങ്കില് സാധനകളെക്കാള് ആവശ്യം ദേവീ കാരുണ്യമാണ്.
അഗ്നി ദേവിയെ ആരാധിച്ചാണ് ചൂടും ജ്വാലയും നേടിയത്. വിഷ്ണുഭഗവാന് രാമാവതാരത്തിലും കൃഷ്ണാവതാരത്തിലും ദേവിയെ ആരാധിക്കുന്നു. സന്ദര്ഭങ്ങള് പുരാണങ്ങളിലുണ്ട്. വിഷ്ണു ഭഗവാനെ യോഗനിദ്രയിലാക്കുന്നതും ഉണര്ത്തുന്നതും യോഗമായയായ ദേവിയാണ്. വീരഭദ്രന് ദേവിയുടെ അംഗരക്ഷകനായി സദാ മൂകാംബികയെ സേവിക്കുന്ന കഥ ഈ വ്യാഖ്യാനത്തിന്റെ തുടക്കത്തില് പറഞ്ഞു.
ഇങ്ങനെ പലതരത്തില് ദേവി വീരവന്ദ്യയാണ്.
162 . മധുകൈടഭനാശിനീ – മധുവിനെയും കൈടഭനെയും നശിപ്പിച്ചവള്. മഹാവിഷ്ണു യോഗനിദ്രയിലായിരുന്ന കാലത്ത് ഭഗവാന്റെ കര്ണ്ണമലത്തില്നിന്നുണ്ടായ രണ്ടു അസുരന്മാരാണു മധുവും കൈടഭനും. ഭഗവാന്റെ നാഭികമലത്തിനുള്ളിലിരുന്ന ബ്രഹ്മാവിനെ കണ്ട അവര് ബ്രഹ്മാവിനെ കൊല്ലാന് തുനിഞ്ഞു. ഭയപ്പെട്ട ബ്രഹ്മദേവന് വിഷ്ണുഭഗവാനെ ഉറക്കത്തിലാക്കിയ യോഗനിദ്രാരൂപയായ ദേവിയെ സ്തുതിച്ചു. ദേവി ഭഗവാന്റെ ശരീരത്തില്നിന്നു പിന്മാറിയപ്പോള് ഭഗവാന് ഉണര്ന്നെണീറ്റ് ബ്രഹ്മാവിനെ കൊല്ലാനെത്തിയ മധുകൈടഭരെ തടഞ്ഞു. മധുകൈടഭന്മാരും മഹാവിഷ്ണുവും തമ്മില് വളരെക്കാലം നീണ്ട യുദ്ധമുണ്ടായി.
അയ്യായിരം കൊല്ലക്കാലം നീണ്ട യുദ്ധത്തില് ആര്ക്കും ജയവും തോല്വിയും ഉണ്ടായില്ല. അപ്പോള് ദേവിയുടെ പ്രേരണകൊണ്ട് ഉദ്ധതരായ മധുകൈടഭര് വിഷ്ണുവിനോട് ” അങ്ങയുടെ യുദ്ധസാമര്ത്ഥ്യത്തില് ഞങ്ങള് പ്രീതരായിരിക്കുന്നു.
അങ്ങേയ്ക്ക് ആവശ്യമുള്ള വരം ഞങ്ങള് തരാം” എന്നു പറഞ്ഞു.” ഇപ്പോള് എനിക്കു വേണ്ട വരം നിങ്ങളുടെ മരണമാണ് എന്നു ഭഗവാന് മറുപടി പറഞ്ഞു. തങ്ങള്ക്ക് അബദ്ധം പറ്റി എന്നു മനസ്സിലാക്കിയ അസുരന്മാര് ചുറ്റും നോക്കിയപ്പോള് ജഗത്താകെ ജലമയമായി ഏകാര്ണ്ണവമായി കണ്ടു. വെള്ളമില്ലാത്ത സ്ഥലം ഒരിടത്തുമില്ല എന്നു കണ്ടു. ” വെള്ളമില്ലാത്ത സ്ഥലത്തുവച്ച് ഞങ്ങളെ വധിച്ചുകൊള്ളുക” എന്ന് അവര് അനുവദിച്ചു. ഭഗവാന് തന്റെ തുടകളുടെ വലുപ്പം വര്ദ്ധിപ്പിച്ച് അതില് അവരെ കിടത്തി ചക്രംകൊണ്ടു കഴുത്തു മുറിച്ചുകൊന്നു. ഈ കഥ ദേവീമാഹാത്മ്യത്തിലും ദേവീഭാഗവതത്തിലും വിസ്തരിച്ചിട്ടുള്ളതു വായിക്കുക.
മധുകൈടഭന്മാരെ വധിച്ചതു വിഷ്ണുവാണെങ്കിലും ദേവിയാണ് അതിനുള്ള പ്രേരണയും ശക്തിയുമായി വര്ത്തിച്ചത്. അതുകൊണ്ട് മധുകൈടഭന്മാരെ വധിച്ചവളായി ദേവിയെ സ്തുതിക്കുന്നു.
(ഇതുമുതല് 223 വരെയുള്ള നാമങ്ങള് ദേവീമാഹാത്മ്യത്തില് വിവരിച്ചിട്ടുള്ള സംഭവങ്ങളുമായി ബന്ധപ്പെട്ടവയാണ്)
…. തുടരും
