ഹോട്ടലിനുള്ളില് കടന്ന മോഷ്ടാവിന്റെ സിസിടിവി ദൃശ്യം
ചെങ്ങന്നൂര്: നഗരമധ്യത്തിലെ വെജിറ്റേറിയന് ഹോട്ടലില് മോഷണം. അരലക്ഷം രൂപയ്ക്ക് മുകളില് കവര്ന്നു. എംസി റോഡില് ഇന്ത്യന് ഓയില് പെട്രോള് പമ്പിന് എതിര്വശം തമിഴ്നാട് സ്വദേശി കുമാറിന്റെ ഉടമസ്ഥതയിലുള്ള ആര്യാസ് ഹോട്ടലിലാണ് കഴിഞ്ഞദിവസം രാത്രിയില് മോഷണം നടന്നത്. ഹോട്ടലിന് പിന്വശത്തെ അടുക്കളയുടെ ഗേറ്റ് തകര്ത്ത് അകത്ത് കടന്ന മോഷ്ടാവ് കാഷ് കൗണ്ടറിലെ മേശ കുത്തിത്തുറന്ന് ഇതിലുണ്ടായിരുന്ന അന്പത്തി എണ്ണായിരം രൂപ അപഹരിക്കുകയായിരുന്നു. മോഷ്ടാവ് ഹോട്ടലിനുള്ളില് പ്രവേശിക്കുന്നതിന്റെയും, കൗണ്ടര് കുത്തിത്തുറന്ന് പണം അപഹരിക്കുന്നതിന്റെയും ദൃശ്യം ഇവിടെ സ്ഥാപിച്ചിട്ടുള്ള സിസി ടിവിയില് പതിഞ്ഞിട്ടുണ്ട്. മുഖം മറച്ചാണ് മോഷ്ടാവ് മോഷണം നടത്തിയിട്ടുള്ളതെന്ന് സിസിടിവിയില് നിന്നും വ്യക്തമാണ്. സിസിടിവി ദൃശ്യങ്ങള് ചെങ്ങന്നൂര് പോലീസിന് കൈമാറിയിട്ടുണ്ട്. പോലീസ് അന്വേഷണം ആരംഭിച്ചു. വിരലടയാള വിദഗ്ദരും സ്ഥലത്തെത്തി പരിശോധന നടത്തി.
