കൊച്ചി: ഭാരതീയ യുവത്വത്തിന്റെ ആകുലതകളേയും ആശങ്കകളേയും പരിമിതികളേയും തിരിച്ചറിഞ്ഞ് യുവത്വത്തിന് യഥാര്ത്ഥ ദിശാബോധം പകര്ന്നുനല്കിയ അത്ഭുത സ്വരൂപനാണെന്നും ആത്മവിശ്വാസത്തിന്റെ വിശ്വരൂപമായിരുന്നു സ്വാമികള് എന്നും വിവേകാനന്ദജയന്തിദിനം ഉദ്ഘാടനം ചെയ്ത് ഭാരത് വികാസ് പരിഷത്ത് ദേശീയ സെക്രട്ടറി കെ. പി. ഹരിഹരകുമാര് അഭിപ്രായപ്പെട്ടു.
ഭാരതത്തിന്റെ നവനിര്മ്മാണത്തിനായി ദേശീയ സമൂഹമനസ്സില് ആത്മാഭിമാനം ജ്വലിപ്പിച്ച കറകളഞ്ഞ സോഷ്യലിസ്റ്റാണ് സ്വാമികള് എന്ന് മുഖ്യപ്രഭാഷണം നടത്തിയ എറണാകുളം കരയോഗം ജനറല് സെക്രട്ടറി പി. രാമചന്ദ്രന് അഭിപ്രായപ്പെട്ടു.
ഭാരത് വികാസ് പരിഷത്ത് കേരളയുടെയും എറണാകുളം കരയോഗത്തിന്റെയും സംയുക്താഭിമുഖ്യത്തില് എറണാകുളം ബോട്ട്ജെട്ടി ചില്ഡ്രന്സ് പാര്ക്കിലെ സ്വാമിജിയുടെ പ്രതിമയില് രാവിലെ നടന്ന പുഷ്പാര്ച്ചന ചടങ്ങില് ഭാരത് വികാസ് പരിഷത്ത് സോണല് സെക്രട്ടറി പി.വി. അതികായന് അദ്ധ്യക്ഷതവഹിച്ചു. എം. രഘുനന്ദന്, അഡ്വ. പി.എസ്. ഗോപിനാഥ്, കെ.പി. ശിവദാസ്, സി.ജി. രാജഗോപാല്, ടീനാ ജെയിന്, സി.പി.എ. നാസര്, രാഹുല് ആന്റണി തുടങ്ങിയവര് പങ്കെടുത്തു. തുടര്ന്ന് കുട്ടികള്ക്ക് പ്രസാദവിതരണം ചെയ്തു.
