130. ഹരിപ്രിയാഃ – ഹരിക്കു പ്രിയപ്പെട്ടവള്. ഹരി-വിഷ്ണു. വിഷ്ണുവിന്റെ പ്രിയപത്നിയായ മഹാലക്ഷ്മീ ഹരിപ്രിയ. മൂകാംബികാദേവി മഹാലക്ഷ്മിയും മഹാസരസ്വതിയും മഹാകാളിയും ഏകീഭവിച്ച പരാശക്തിയാണെന്നു മുന്പു പറഞ്ഞിരുന്നത് ഓര്ക്കുക.
131. ഹംസവതീഃ – ഹംസങ്ങളോടുകൂടിയവള്. ബ്രഹ്മപത്നിയായ മഹാസരസ്വതീ ഹംസവാഹനയാണ്. ഹംസങ്ങളോടുകൂടിയവള് എന്നോ ഹംസത്തോടുകൂടിയവള് എന്നോ നാമത്തെ വ്യാഖ്യാനിക്കാം. പരമഹംസന്മാരായ യോഗിമാരോടു ചേര്ന്നവള് എന്നും വ്യാഖ്യാനിക്കാം.
കുണ്ഡലിനീയോഗത്തില് ഓരോ ആധാരചക്രത്തിലുമുള്ള ദളങ്ങളില് ദേവിയെ സേവിച്ചുനില്ക്കുന്ന ദേവീമൂര്ത്തികളെപ്പറ്റി പറയുന്നുണ്ട്. രണ്ടു ദളങ്ങളുള്ള ആജ്ഞാപദ്മത്തില് ഹംസവതി എന്നും ക്ഷമാവതി എന്നും രണ്ടു ദേവിമാര് വിരാജിക്കുന്നു. അവരില് മുഖ്യ ഹംസവതിയാണ്. ഹംസവതി മഹാദേവിയുടെ ഒരു മൂര്ത്തിയാണ്. ഹംസവതിയായി രൂപം പൂണ്ടവള് എന്നും വ്യാഖ്യാനിക്കാം.
132. ഹരിദ്രാകുങ്കുമപ്രിയാഃ – മഞ്ഞളും കുങ്കുമവും ഇഷ്ടപ്പെടുന്നവള്. ദേവീപൂജയ്ക്കുപയോഗിക്കുന്ന രണ്ടു പൂജാദ്രവ്യങ്ങളാണ് മഞ്ഞളും കുങ്കുമവും. ഇവ രണ്ടും ഇഷ്ടപ്പെടുന്നവള്.
133 സദാശിവാഃ – സദാശിവനായ ശ്രീപരമേശ്വരന്റെ പത്നി. എല്ലായ്പ്പോഴും മംഗളം ദാനംചെയ്ത് ഭക്തരെ അനുഗ്രഹിക്കുന്ന മാതൃദേവി ആയതിനാലും സദാശിവാ.
134. സദാപൂജ്യാഃ – എപ്പോഴും പൂജിക്കപ്പെടുന്നവള്. ആരാധനാവിധികള് അനുശാസിക്കുന്ന സമയനിഷ്ഠ ദേവീപൂജയ്ക്ക് നോക്കേണ്ടതില്ല എന്നൊരഭിപ്രായമുണ്ട്. ദേവി അമ്മയാണ്. സന്താനങ്ങള്ക്ക് അമ്മയെ സമീപിക്കാന് സമയം നോക്കേണ്ട ആവശ്യമില്ല. എപ്പോഴും അമ്മയെ പൂജിക്കാം.
ആപത്തുകാലത്തു ദേവിയെ പൂജിച്ചാല് ആപത്തൊഴിയുമെന്നും സ്വസ്ഥമായിരിക്കുന്നകാലത്തു പൂജിച്ചാല് മനസ്സും ജീവിതവും അത്യന്തം ശുഭമായിത്തീരുമെന്നും ദേവീപുരാണങ്ങള് പറയുന്നു.
135. സദസദ്രൂപധാരിണീഃ – സത്തും അസത്തുമായ രൂപങ്ങള് സ്വീകരിക്കുന്നവള്. പ്രപഞ്ചപ്രതിഭാസങ്ങളെ പാരമാര്ത്ഥികസത്ത, വ്യാവഹാരികസത്ത എന്നു രണ്ടായി വിവരിക്കാറുണ്ട്. നിത്യവും സര്വാധാരവുമായത് പാരമാര്ഥ്ഥികം. അനിത്യവും മറ്റാധാരങ്ങളെ
…തുടരും
