തൃപ്പൂണിത്തുറ: സ്വകാര്യ ബസുകള് സ്റ്റാന്ഡില് കയറാത്തതുമൂലം യാത്രക്കാര് ദുരിതത്തില്. ചോറ്റാനിക്കര, എരുമേലി, പട്ടുകുന്ന്, പാലസ് സ്ക്വയര്, ആശുപത്രിപ്പടി, കണിച്ചിറ, കോട്ടയത്ത്പാറ, മുളന്തുരുത്തി, തുപ്പുംപടി, തലക്കോട് എന്നിവിടങ്ങളില്നിന്നും വരുന്ന യാത്രക്കാരാണ് ദുരിതത്തിലാകുന്നത്.
ചോറ്റാനിക്കര ഭാഗത്തുനിന്നും തൃപ്പൂണിത്തുറ കിഴക്കേകോട്ടയില് എത്താന് ഏഴ് രൂപ മതിയെങ്കില് തലതിരിഞ്ഞ ട്രാഫിക് പരിഷ്കാരംമൂലം ഇപ്പോള് 14 രൂപ മുടക്കിയാലേ തൃപ്പൂണിത്തുറ ടൗണില് ഈ ഭാഗത്തുനിന്നും വരുന്നവര്ക്ക് എത്താനാകൂ. ഇപ്പോള് കിഴക്കന് മേഖലയില്നിന്നുംവരുന്ന യാത്രക്കാര് എസ്എന് ജംഗ്ഷന്, വടക്കേകോട്ട സ്റ്റോപ്പുകളില് ഇറങ്ങി തൃപ്പൂണിത്തുറ ടൗണിലേയ്ക്ക് വണ്ടി മാറികേറിവേണം എത്താന്. ഇത് വൃദ്ധര് ഉള്പ്പെടെയുള്ള യാത്രക്കാര്ക്ക് ഏറെ ബുദ്ധിമുട്ട് ഉണ്ടാകുന്നു. ഇതുമൂലം തൃപ്പൂണിത്തുറ പ്രൈവറ്റ് ബസ്സ്റ്റാന്റ് നോക്കുകുത്തിയാകുന്നതായി പൊതുപ്രവര്ത്തകരും നാട്ടുകാരും ആരോപിച്ചു.
