മാന്നാര്: ബുധനൂര് കുന്നത്തൂര്കുളങ്ങര ദേവീക്ഷേത്രത്തിലെ കാണിക്കവഞ്ചി കുത്തിതുറന്ന് പണം മോഷ്ടിക്കാന് ശ്രമം. ടിപ്പര് ലോറി ജീവനക്കാര് കണ്ടതിനാല് ശ്രമം ഉപേക്ഷിച്ച് മോഷ്ടാക്കള് രക്ഷപെട്ടു. ശനിയാഴ്ച പുലര്ച്ചെ രണ്ടോടെയാണ് സംഭവം. മണ്ഡപത്തിനു പിന്നിലുള്ള ഗ്രില്ലിട്ട് പൂട്ടിയ ഭാഗത്തെ താഴ് തകര്ത്ത് ഉള്ളില് കടന്ന മോഷ്ടാക്കള് മുകളില് വച്ചിരുന്ന ദേവീവിഗ്രഹം എടുത്ത് മാറ്റി. തുടര്ന്ന് പൂട്ടു തുറന്ന് പണം അപഹരിക്കാനായിരുന്നു ശ്രമം. ഈ സമയം ഇവിടെ കാണിക്ക ഇട്ടതിനു ശേഷം ഓട്ടം പോകുവാനായി എത്തിയ ടിപ്പര് ലോറി ജീവനക്കാരന് രണ്ടു പേര് ഓടി രക്ഷപെടുന്നത് ശ്രദ്ധയില്പെട്ടു. തുടര്ന്ന് നടത്തിയ പരിശോധനയിലാണ് മോഷണ ശ്രമം നടന്നതായി കണ്ടെത്തിയത്.
ജീവനക്കാര് ഉടന്തന്നെ ക്ഷേത്ര ഭാരവാഹികളെ വിവരം അറിയിച്ചു. മാന്നാര് പോലീസ് സ്ഥലത്തെത്തി പരിശോധന നടത്തി. ഒരുമാസത്തില് ഒരിക്കലാണ് ഇവിടെ കാണിക്കവഞ്ചി തുറന്ന് പണം എടുക്കുന്നത്. രണ്ടു ദിവസത്തിനുള്ളില് കാണിക്കവഞ്ചി എടുക്കാനിരിെക്കയാണ് മോഷണ ശ്രമം നടന്നത്. ഏകദേശം ഇരുപത്തി അയ്യായിരത്തോളം രൂപയാണ് ഒരുതവണ ഇവിടെ നിന്നും ലഭിക്കുന്നത്.
