കൊച്ചി: ഐസിസി ക്രിക്കറ്റ് ലോകകപ്പ് ട്രോഫിക്ക് കൊച്ചിയില് ആവേശകരമായ വരവേല്പ്. ലോകപ്പ് ട്രോഫി ഇതാദ്യമായാണ് കൊച്ചിയില് പര്യടനം നടത്തുന്നത്.
11-ാമത് ഐസിസി ലോകകപ്പ് ക്രിക്കറ്റിന്റെ ഗ്ലോബല് പാര്ട്ണര് ആയ റിലയന്സ് കമ്യൂണിക്കേഷന്സ് ആണ് ലോകകപ്പ് ട്രോഫി കൊച്ചിയില് എത്തിച്ചത്.
2007 -ല് നടന്ന പ്രഥമ ഐസിസി ട്വന്റി 20 ലോകകപ്പ് മുതല്, റിലയന്സ് കമ്യൂണിക്കേഷന്സ് ഐസിസിയുടെ ഗ്ലോബല് പാര്ട്ണര് ആണ്. 2015 ഫെബ്രുവരി 14 മുതല് മാര്ച്ച് 20 വരെ ന്യൂസിലാന്ഡിലും ആസ്ട്രേലിയയിലുമാണ് ലോകകപ്പ് ക്രിക്കറ്റിന്റെ 11-ാം പതിപ്പ് അരങ്ങേറുക.
സെബാസ്റ്റ്യന് ജോസഫ് സര്ക്കിള് ഹെഡ് റിലയന്സ്, ശ്രീനാഥ് വിജയന് മാര്ക്കറ്റിംഗ് ഹെഡ്, അജി ജോര്ജ് സര്ക്കിള് ഹെഡ് സിഡിഎംഎ എന്നിവര് പത്രസമ്മേളനത്തില് പങ്കെടുത്തു.
ജെറാര്ഡ്, ദി ക്രൗണ് ജുവല്ലേഴ്സ് ആണ് ഐസിസി ക്രിക്കറ്റ് ലോകകപ്പ് 2015 ട്രോഫി രൂപകല്പന ചെയ്ത് നിര്മിച്ചത്. വെള്ളിയിലും ഗില്റ്റിലും മെനഞ്ഞെടുത്ത ശില്പത്തിന് ഉയരം 64 സെന്റിമീറ്റര്. മൂന്ന് വെള്ളികോളങ്ങളില് ഉയര്ത്തിയ സ്വര്ണ ഗോളകമാണ് ട്രോഫി.
കോളങ്ങള് സ്റ്റംപുകളേയും ബെയിലുകളേയും അനുസ്മരിപ്പിക്കുന്നു. സുവര്ണ ഗോളകം ക്രിക്കറ്റ് ബോളിനെയും. മൂന്ന് സ്റ്റംപുകള് ക്രിക്കറ്റിന്റെ മൂന്ന് നെടുംതൂണുകളായ ബാറ്റിംഗ്, ബൗളിംഗ്, ഫീല്ഡിംഗ് എന്നിവയെ പ്രതിനിധാനം ചെയ്യുന്നു. 40,000 പൗണ്ട് വിലമതിക്കുന്ന ട്രോഫിയുടെ തൂക്കം 11 കിലോഗ്രാമിലേറെ വരും.
