ചിതറ: കടയ്ക്കല് ചിതറയില് ബിജെപി പ്രവര്ത്തകനെ വെട്ടിക്കൊലപ്പെടുത്താന് നടത്തിയ സിപിഎം ശ്രമം വെളിപ്പെടുത്തുന്നത് പാര്ട്ടിയുടെ ഹീനതന്ത്രം. കടയ്ക്കലും ചിതറയും തങ്ങളുടെ ഉറച്ച പാര്ട്ടിഗ്രാമമെന്ന് കരുതിയിരുന്നിടത്താണ് പാര്ട്ടിവിട്ട് നിരവധിയാളുകള് സംഘപരിവാര് പ്രസ്ഥാനത്തിലേക്ക് ചേക്കേറി തുടങ്ങിയത്. മോദി പ്രഭാവത്തില് പാര്ട്ടിഗ്രാമങ്ങള് തകര്ന്നു തുടങ്ങിയപ്പോള് തങ്ങളുടെ അവസാനത്തെ അത്താണിയായ പാര്ട്ടിയെ ഉറപ്പിച്ചുനിര്ത്താനുള്ള ശ്രമത്തിലാണ് സിപിഎം.
കഴിഞ്ഞദിവസം അയിരക്കുഴി സ്വദേശി വിജയകുമാറിനെ ദാരുണമായി വെട്ടിക്കൊല്ലാന് ശ്രമം നടത്തിയത് ഈ ഹീനതന്ത്രത്തിന്റെ ഉദാഹരണമാണ്. ഇദ്ദേഹത്തെ വെട്ടിക്കൊലപ്പെടുത്താന് ശ്രമിച്ച രണ്ട് ഡിവൈഎഫ്ഐ പ്രവര്ത്തകര് ഇപ്പോള് റിമാന്റിലാണ്. കാറിലെത്തിയ അക്രമിസംഘം വീടിനകത്ത് കയറി വിജയകുമാറിനെ വെട്ടിപ്പരിക്കേല്പ്പിക്കുകയായിരുന്നു. വെട്ടേറ്റ വിജയന് മരിച്ചെന്ന് കരുതി അക്രമികള് രക്ഷപ്പെടുകയായിരുന്നു. ശരീരമാസകലം മാരകമായി വെട്ടേറ്റ വിജയന് മെഡിക്കല് കോളജ് ആശുപത്രിയില് ചികിത്സയിലാണ്.
കടക്കല് മേഖലയില് സിപിഎം കണ്ണൂര് മോഡല് അക്രമണമാണ് പിന്തുടരുന്നത്. ഏകപക്ഷീയമായ ആക്രമണമാണ് മാര്ക്സിസ്റ്റുകളുടെത്. മുമ്പും മേഖലയില് ബിജെപി-ആര്എസ്എസ് പ്രവര്ത്തകരെ വെട്ടികൊലപ്പെടുത്താന് ശ്രമിച്ചിരുന്നു. കൊടിമരങ്ങള് നശിപ്പിച്ചുകൊണ്ടാണ് പ്രകോപനം നടത്തുന്നത്. സിപിഎം വിട്ട് സിഎംപിയില് ചേര്ന്ന പ്രവീണ്ദാസിനെ അമ്മയുടെ മുന്നിലിട്ട് വെട്ടിക്കൊന്നവരാണ് ഇവിടത്തെ സിപിഎമ്മുകാര്. ഇപ്പോള് പോപ്പുലര് ഫ്രണ്ട് അക്രമിസംഘത്തില് നിന്നും നിലമേല് പട്ടണത്തിലും കടയ്ക്കലിലും പട്ടാപ്പകല് അടി കൊണ്ടതിന്റെ ജാള്യത മറയ്ക്കാനാണ് സംഘപരിവാര് പ്രവര്ത്തകരുടെ ജീവനെടുക്കാന് സിപിഎം മുതിരുന്നത്.
സിപിഎമ്മിന്റെ സജീവപ്രവര്ത്തകരും നേതൃനിരയിലുണ്ടായിരുന്നവരും നിഷ്ക്രിയരാവുകയും പലയിടത്തും ബിജെപിയിലേക്ക് കൂട്ടപ്പലായനം നടത്തുന്നതിന്റെയും പശ്ചാത്തലത്തില് ഇതിന് തടയിടാനായാണ് സിപിഎം ഉന്നത നേതൃത്വതതിന്റെ അറിവോടെ കൊലപാതകശ്രമം നടന്നത്. നിരപരാധിയായ വിജയകുമാറിനെ വീട്ടില് കയറി വെട്ടിക്കൊലപ്പെടുത്താന് പാര്ട്ടി ക്രിമിനലുകള് നടത്തിയ നീക്കത്തില് ജനരോഷം ശക്തമായിട്ടുണ്ട്.
