കൊല്ക്കത്ത: ബര്ദ്വാന് സ്ഫോടനക്കേസില് പ്രധാനപ്രതിയുടെ ഭാര്യയെയും സഹായികളായ മൂന്നുപേരെയും ബംഗ്ലാദേശ് പോലീസ് ഞായറാഴ്ച അറസ്റ്റു ചെയ്തു. കൂടാതെ പാക്കിസ്ഥാന് പൗരനായ ഒരാളടക്കം മറ്റ് അഞ്ചു ഭീകരവാദികളെയും പോലീസ് പിടികൂടിയിട്ടുണ്ട്.
ബര്ദ്വാന് കേസിലെ മുഖ്യപ്രതി സാജിദിന്റെ ഭാര്യ ഫാത്തിമ ബീഗമാണ് പിടിയിലായത്. ഇവര് കുറഞ്ഞത് ഇന്ത്യയിലെ 25 സ്ത്രീകള്ക്ക് ഭീകര പരിശീലനം നല്കിയിട്ടുണ്ടെന്ന് ഢാക്ക മെട്രോ പൊളിറ്റന് പോലീസ് ഡെപ്യൂട്ടി കമ്മീഷണര് മസൂദുര് റഹ്മാന് പറഞ്ഞു. നിരോധിത ഭീകര സംഘടനയായ ജമാ അത്ത് ഉല് മുജാഹിദ്ദീന് ബംഗ്ലാദേശിന്റെ വനിതാ വിഭാഗം മേധാവിയാണ് 25 കാരിയായ ഫാത്തിമയെന്നും അദ്ദേഹം വ്യക്തമാക്കി.
ഈ ഭീകരസംഘടന ബംഗ്ലാദേശ് പ്രധാനമന്ത്രി ഷെയ്ക് ഹസീനയെയും പ്രതിപക്ഷ നേതാവ് ഖാലിദ സിയയെയും കൊലപ്പെടുത്താന് ലക്ഷ്യമിട്ടിരുന്നു. സ്ഫോടകവസ്തുക്കളും ബോംബുണ്ടാക്കാനുള്ള സാമഗ്രികളും ജിഹാദി പുസ്തകങ്ങളുമായി ഫാത്തിമയും മൂന്ന് സഹായികളും ഢാക്ക സാദര്ഘട്ടിന് സമീപത്തു നിന്നാണ് പിടിയിലായത്. ഇന്ത്യയില് നിന്ന് എന്ഐഎ രഹസ്യവിവരം നല്കിയതിനാലാണ് ഫാത്തിമയെ പിടികൂടാനായതെന്നും പോലീസ് വക്താവ് മൊനിറുല് ഇസ്ലാം പറഞ്ഞു.
നേതാക്കളുടെ നിര്ദ്ദേശാനുസരണം ഇന്ത്യ-ബംഗ്ലാദേശ് അതിര്ത്തിയില് ആക്രമണത്തിനായാണ് സ്ഫോടകവസ്തുക്കള് കൈവശം വച്ചതെന്ന് ഫാത്തിമ കുറ്റസമ്മതത്തിനിടയില് പറഞ്ഞതായി പോലീസ് സ്ഥിരീകരിച്ചു. ഒരു പാക് പൗരനടക്കം മറ്റ് അഞ്ച് ഭീകരര് നഗരത്തിന്റെ തെക്കന് പ്രദേശമായ ചിറ്റഗോംഗില് നിന്നാണ് പിടിയിലായത്. പിടിയിലായ പാക് പൗരന് മുഹമ്മദ് അലമില് നിന്ന് പാക്കിസ്ഥാനി പാസ്പോര്ട്ട് പിടിച്ചെടുത്തിട്ടുണ്ട്. എന്നാല് താന് നെതര്ലാന്ഡ് അടിസ്ഥാനമാക്കി ആഗോളതലത്തില് പ്രവര്ത്തിക്കുന്ന റോഹിന്ഗ്യ കേന്ദ്രത്തിന്റെ പ്രതിനിധിയാണെന്നാണ് ഇയാളുടെ വാദം.
