പറവൂര്: പറവൂര് നഗരസഭ അംബേദ്കര് പാര്ക്കില് പുതിയതായി നിര്മ്മിച്ചിട്ടുള്ള സയന്സ് പാര്ക്കിന് ജവഹര്ലാല് നെഹ്റു സയന്സ് എന്ന് നാമകരണം ചെയ്ത് ബി.ആര്. അംബേദ്ക്കറെ അപമാനിച്ചതില് പ്രതിഷേധിച്ച് ഹിന്ദു ഐക്യവേദി സയന്സ് പാര്ക്ക് ഉദ്ഘാടന വേദിയിലേക്ക് നടത്തിയ മാര്ച്ചില് പ്രതിഷേധം ആളിക്കത്തി.
പറവൂര് നമ്പൂരിയച്ഛന് ആല് പരിസരത്തുനിന്ന് ആരംഭിച്ച മാര്ച്ച് പോലീസ് ചിത്രാഞ്ജലി തീയേറ്ററിന് സമീപം തടഞ്ഞു. തുടര്ന്ന് നടന്ന വിശദീകരണ യോഗം ഹിന്ദു ഐക്യവേദി സംസ്ഥാന ജനറല് സെക്രട്ടറി ആര്.വി. ബാബു ഉദ്ഘാടനം ചെയ്തു.
അംബേദ്ക്കറുടെ പേര് മാറ്റി നെഹ്റുവിന്റെ പേരിടുന്നതിനെതിരെ ഉയര്ന്നുവന്നിട്ടുള്ള ജനവികാരം മനസിലാക്കാന് വി.ഡി. സതീശന് തയ്യാറാകണമെന്ന് ആര്.വി. ബാബു പറഞ്ഞു.
കെപിഎംഎസ് പറവൂര് താലൂക്ക് പ്രസിഡന്റ് പ്രൊഫ. എം. മോഹനന്, അയ്യങ്കാളി സാംസ്കാരികകേന്ദ്രം സംസ്ഥാന സെക്രട്ടറി പി.കെ. ബാഹുലേയന്, ഹിന്ദു ഐക്യവേദി ജില്ലാ സെക്രട്ടറി കെ.ആര്. രമേഷ്കുമാര്, താലൂക്ക് ജനറല് സെക്രട്ടറി എം.സി. സാബുശാന്തി, ബിജെപി മണ്ഡലം പ്രസിഡന്റ് അജി ചോട്ടശ്ശേരി, എം.എന്. ബാലചന്ദ്രന് എന്നിവര് പ്രസംഗിച്ചു.
തമ്പി കല്ലുപുറം, കെ.ജി. സജീവ്, ടി.എ. ദിലീപ്, ടി.ജി.വിജയന്, കെ.ബി. നിര്മ്മല്, ബോബി മാക്കനായി എന്നിവര് നേതൃത്വം നല്കി.
