നരേന്ദ്രമോദി സര്ക്കാരിലെ വനിതാ പ്രാതിനിധ്യം എട്ടിലേക്കുയര്ത്തിയ വനിതയാണ് ഉത്തര്പ്രദേശ് എംപി സാഥ്വി നിരഞ്ജന് ജ്യോതി. ഞായറാഴ്ച നടന്ന മന്ത്രിസഭാ പുന:സംഘടനയിലെ ഏക പെണ്മുഖം. 47 കാരിയായ സാഥ്വി ഫത്തേപ്പൂര് മണ്ഡലത്തില് നിന്നാണ് ലോക്സഭയില് എത്തിയത്. ദളിത് എംപിയെന്ന പ്രത്യേകതയുമുണ്ട്. മന്ത്രിസഭാ പുന:സംഘടനയില് സ്ഥാനം പിടിച്ച യുപിക്കാരില് നാലുപേരില് ഒരാളും ഈ വനിതയാണ്.
1967-ല് ജനിച്ച സാഥ്വി കുട്ടിക്കാലം മുതല് മതപരമായ കാര്യങ്ങളിലാണ് ശ്രദ്ധപുലര്ത്തിയിരുന്നത്. മികച്ച മതപ്രഭാഷകയുമാണ്. നിഷാദ് മതവിഭാഗത്തില് നിന്നുള്ള സാഥ്വി 2002, 2007, 2012 എന്നീ വര്ഷങ്ങളില് ബിജെപി ടിക്കറ്റില് മത്സരിച്ച് വന് വിജയം നേടിയിരുന്നു. നിഷാദ്, കശ്യപ് മതവിഭാഗങ്ങളില് നിന്നും വലിയ പിന്തുണയുണ്ട് ഇവര്ക്ക്.
ആര്എസ്എസ്, വിശ്വഹിന്ദു പരിഷത്ത് എന്നിവയിലൂടെയുള്ള പ്രവര്ത്തനങ്ങള് വഴിയാണ് ബിജെപിയിലേക്കുള്ള സാഥ്വിയുടെ പ്രവേശനം. ലോക്സഭാ തെരഞ്ഞെടുപ്പില് ഉത്തര്പ്രദേശിലെ ദളിത് വോട്ടുകള് ബിജെപിക്കു നേടിക്കൊടുക്കുന്നതില് വലിയ പങ്കു വഹിച്ചതും സാഥ്വിയാണ്. ഭക്ഷ്യ സംസ്ക്കരണ വ്യവസായ സഹമന്ത്രി സ്ഥാനമാണ് മന്ത്രിസഭാ പുന:സംഘടന വഴി സാഥ്വിക്ക് ലഭിച്ചത്.
കാബിനറ്റ് റാങ്കുള്ള ആറ് വനിതാ മന്ത്രിമാരുള്പ്പെടെ ഏഴ്പേരാണ് മെയ് മാസത്തില് മോദി സര്ക്കാരിന്റെ ഭാഗമായത്.
സുഷമസ്വരാജ്, ഉമാ ഭാരതി, നജ്മ ഹെപ്തുള്ള, മേനകാഗാന്ധി, ഹര്സിമ്രത് കൗര് ബാദല്, സ്മൃതി ഇറാനി, നിര്മ്മല സീതാരാമന് എന്നിവരാണ് ആദ്യം മന്ത്രിസഭയില് എത്തിയത്. ഇവരില് ഏറ്റവും പ്രായം കുറഞ്ഞ മന്ത്രി സ്മൃതിയും പ്രായം കൂടിയ വനിത നജ്മ ഹെപ്തുള്ളയുമാണ്.
