ഇസ്ലാമാബാദ്: തെക്കന് പാക്കിസ്ഥാനില് ബസ് ട്രക്കുമായി കൂട്ടിയിടിച്ച് 56 പേര് മരിച്ചു. 18 പേര്ക്ക് പരിക്കേറ്റു. മരിച്ചവരില് 18 കുട്ടികളും ഉള്പ്പെടുന്നു. സിന്ധ് പ്രവിശ്യയിലെ സ്ക്കൂര് ജില്ലയിലൂടെ കടന്നുപോകുന്ന തെഹ്രി ബൈപ്പാസില് ചൊവ്വാഴ്ച രാവിലെയാണ് അപകടം.
വടക്ക് പടിഞ്ഞാറന് പട്ടണമായ സ്വാത് താഴ് വരയില് നിന്ന് 80 യാത്രക്കാരുമായി വരികയായിരുന്ന ബസ് നിയന്ത്രണം വിട്ട് എതിരെ വരികയായിരുന്ന ട്രക്കില് ഇടിക്കുകയായിരുന്നു. മരിച്ചവരില് പലരും അപകടം നടന്ന സ്ഥലത്തുവെച്ചു തന്നെ കൊല്ലപ്പെട്ടു.
പരിക്കേറ്റവരില് പലരുടെയും നില ഗുരുതരമാണെന്ന് ആശുപത്രി വൃത്തങ്ങള് അറിയിച്ചു. സൈന്യത്തിന്റെ നേതൃത്വത്തില് സംഭവസ്ഥലത്ത് രക്ഷാപ്രവര്ത്തനം ഊര്ജിതമായി തുടരുകയാണ്. ഡ്രൈവര് ഉറങ്ങിപ്പോയതാണ് അപകടകാരണമെന്നാണ് പോലീസിന്റെ പ്രാഥമിക നിഗമനം.
