ന്യൂദല്ഹി: വാഗ അതിര്ത്തിയില് കഴിഞ്ഞ ശനിയാഴ്ച്ച സ്ഫോടനം നടത്തിയ ഭീകരരെ നിയമത്തിന് മുന്നില് കൊണ്ടുവരാന് വേണ്ട നടപടികള് ഉടന് കൈക്കൊള്ളണമെന്ന് പാക്കിസ്ഥാനോട് ഐക്യരാഷ്ട്ര സഭ ആവശ്യപ്പെട്ടു. ആക്രണമത്തെ കടുത്ത ഭാഷയില് അപലപിച്ച യുഎന് ജനറല് സെക്രട്ടറി ബാന് കി മൂണ് അപകടത്തില് കൊല്ലപ്പെട്ടവരുടെയും കുടുംബങ്ങളെ അനുശോചനം അറിയിച്ചു.
ശനിയാഴ്ച്ച വാഗ അതിര്ത്തിയില് ഒരു ഭീകരന് നടത്തിയ ചാവേറാക്രമണത്തില് 64 പേര് മരിക്കുകയും 120 പേര്ക്ക് പരിക്കേല്ക്കുകയും ചെയ്തിരുന്നു. അക്രമത്തില് കൊല്ലപ്പെട്ടവരിലേറെയും വാഗ അതിര്ത്തിയില് ഇരുരാജ്യങ്ങളുടെയും പതാക താഴ്ത്തല് പരിപാടി കണ്ട് മടങ്ങുന്നവരായിരുന്നു. ആക്രമണത്തിന്റെ ഉത്തരവാദിത്തം പാക് താലിബാന് ഏറ്റെടുത്തിരുന്നു.
ലാഹോറിനു സമീപം പാക് നിയന്ത്രിത മേഖലയിലാണ് സ്ഫോടനം നടന്നത്. സ്ഫോടനത്തിന് പിന്നില് പ്രവര്ത്തിച്ചുവെന്ന് കരുതുന്ന ഇരുപത് പേരെ അന്വേഷണ ഉദ്യോഗസ്ഥര് കസ്റ്റഡിയിലെടുത്തിരുന്നു. അതിര്ത്തിയിലെ അതീവ ജാഗ്രതാ മേഖലയില് സുരക്ഷാ കോംപ്ലക്സിലേക്ക് അതിക്രമിച്ചു കടക്കാന് ശ്രമിച്ച പതിനെട്ടുകാരനായ ചാവേറാണ് പൊട്ടിത്തെറിച്ചത്.
ചെക്ക് പോസ്റ്റില് പാക് സൈനികര് തടഞ്ഞയുടന് യുവാവ് സ്ഫോടനം നടത്തി. ഭാരതത്തിന്റെ നിയന്ത്രണത്തിലുള്ള ചെക്ക് പോസ്റ്റിലെത്തി കൂടുതല് നാശംവിതയ്ക്കാന് ചാവേര് പദ്ധതിയിട്ടിരുന്നെന്ന് കരുതപ്പെടുന്നു.
