പള്ളുരുത്തി: ഗര്ഭിണികളായ പശുക്കളെ കൊല്ലുന്നതിന് പുറമെ പടിഞ്ഞാറന് കൊച്ചിയില് കന്നുകുട്ടികളെ കശാപ്പുചെയ്യുന്നത് വ്യാപകമാകുന്നു. ആഴ്ചകള് മാത്രം പ്രായമുള്ള പശുക്കുട്ടികളുടെ മാംസത്തിന് വന് ഡിമാന്റായതോടെ തമിഴ്നാട്ടില്നിന്നും കന്നുകുട്ടികളെ വന് തോതിലാണ് കേരളത്തിലേക്ക് കയറ്റിവിടുന്നത്. കഴിഞ്ഞ ദിവസം പടിഞ്ഞാറന് മേഖലയിലെ മരക്കടവ് അറവുശാലയില് അഞ്ച് ദിവസം മാത്രം പ്രായമുള്ള കന്നുകുട്ടിയെ അറക്കുവാനുള്ള നീക്കം നാട്ടുകാര് ഇടപെട്ട് തടഞ്ഞിരുന്നു. ‘ബിരിയാണി മട്ടന്’ എന്ന പേരിലാണ് ഇത്തരം മാംസം വിപണിയില് എത്തുന്നത്. ആട്ടിറച്ചിയുമായി സാമ്യമുള്ളതിനാല് ഇത്തരം ഇറച്ചിയുമായി ചേര്ത്ത് മട്ടന്-ചാപ്സായും ഇവ വിറ്റഴിക്കുന്നതായി നാട്ടുകാര് പരാതിപ്പെടുന്നു.
ഹോട്ടലുകളില് ആട്ടിറച്ചിയെന്ന പേരില് ഇവ സുലഭമായി വിറ്റഴിക്കപ്പെടുകയാണ്. ഏതാനും മാസങ്ങള്ക്ക് മുമ്പ് പടിഞ്ഞാറന് കൊച്ചിയിലെ ഒരു അറവുശാലയില് ഗര്ഭിണിയായ പശുവിനെ അറക്കാനുള്ള നീക്കം പൊതുപ്രവര്ത്തകരുടെ ഇടപെടല് മൂലം തടസപ്പെട്ടിരുന്നു. നിര്ദ്ദയം ഇത്തരം കശാപ്പുകള് നഗരസഭയുടെ മൗനാനുവാദത്തോടെയാണെന്ന് ആക്ഷേപം ഉയരുന്നുണ്ട്. വന് റാക്കറ്റുകളുടെ പിന്തുണയോടുകൂടി നടക്കുന്ന ഇത്തരം ക്രൂരകൃത്യങ്ങള് പടിഞ്ഞാറന് കൊച്ചിയില് വ്യാപകമായിരിക്കുകയാണ്. കന്നുകുട്ടികളെ കശാപ്പുചെയ്യുന്നത് നിയമം മൂലം നിരോധിച്ചിട്ടുണ്ടെങ്കിലും കൊച്ചിയില് ഇത് ബാധകമല്ലെന്ന സ്ഥിതിയാണ്. കൊച്ചി നഗരസഭയുടെ അറവുശാല പ്രവര്ത്തനം നിലച്ചതോടെ ഇറച്ചിക്കടകളുടെ അകങ്ങളും പൊതുറോഡുകളും വരെ കശാപ്പുകേന്ദ്രങ്ങളായി മാറിയിരിക്കുകയാണ്. നിരവധി പരാതികള് നഗരസഭക്ക് അനധികൃത അറവുകേന്ദ്രങ്ങളെപ്പറ്റി ലഭിക്കുന്നുണ്ടെങ്കിലും ഇതൊന്നും പരിഹരിക്കാന് ഇവിടെ മതിയായ സംവിധാനങ്ങളോ ഉദ്യോഗസ്ഥരോ ഇല്ല. അതിര്ത്തി കടന്നെത്തുന്ന കന്നുകുട്ടികളെ കാണാന് പോലും ചെക്ക്പോസ്റ്റുകളില് കണ്ണുകളുമില്ല.
