ലണ്ടണ്: കശ്മീര് വിഷയത്തില് ഭാരതത്തിന് ധാര്മ്മിക വിജയം. ബ്രിട്ടീഷ് പാര്ലമെന്റില് നടന്ന ചര്ച്ചയിലാണ് ഭാരതത്തിന് മേല്കൈ നേടാനായത്. പാര്ലമെന്റില് ഭൂരിഭാഗം എംപിമാരും ഭാരതത്തിനു പിന്തുണ നല്കി വോട്ട് ചെയ്തു. ഭീകരപ്രവര്ത്തനങ്ങളെ അപലപിച്ച ബ്രിട്ടീഷ് പാര്ലമെന്റ്, പ്രശ്നങ്ങള് പരിഹരിക്കുന്നതിനുള്ള മധ്യസ്ഥ ചര്ച്ചകളെ നിരാകരിക്കുന്ന പാക് നിലപാടിനെയും അപലപിച്ചു.
മൂന്ന് മണിക്കൂര് നീണ്ട ചര്ച്ചയില് പാക്കിസ്ഥാനേക്കാള് പിന്തുണ ലഭിച്ചത് ഭാരതത്തിനായിരുന്നു. ഭീകരപ്രവര്ത്തനവും അതിക്രമങ്ങളും ചര്ച്ചയിലൂടെ മാത്രമേ അവസാനിപ്പിക്കാന് സാധിക്കൂ. എന്നാല് പാക്കിസ്ഥാന്റെ നിലപാട് മറ്റൊന്നാണ്. പാക്കിസ്ഥാനില് നിന്നും അതിര്ത്തിവഴി ഭീകരര് കടന്നുകയറുന്നതിനെതിരെ ഭാരതസര്ക്കാര് സ്വീകരിച്ച നിലപാടിനെ പിന്തുണയ്ക്കുന്നുവെന്നും വിദേശകാര്യ മന്ത്രി തോബിയാസ് എല്വൂദ് പറഞ്ഞു.
ചര്ച്ചയില് പങ്കെടുത്ത 18 എംപിമാരില് മൂന്ന് പേര് മാത്രമാണ് പാക്കിസ്ഥാന് പിന്തുണ പ്രഖ്യാപിച്ചത്. ഇതില് ഒരാളുടെ ഭാര്യ പാക്കിസ്ഥാനില് നിന്നുള്ളതാണ്. മറ്റ് രണ്ട് പേരും പാക്കിസ്ഥാന് പൗരന്മാരാണ്. ഭാരതത്തിന്റെ അവിഭാജ്യ ഘടകമാണ് ജമ്മുകശ്മീരെന്ന് എംപി വീരേന്ദ്രശര്മ്മ പറഞ്ഞു. കശ്മീര് പണ്ഡിറ്റുകളുടെ പുനരധിവാസമാണ് പ്രധാനപ്രശ്നമെന്ന് ബോബ് ബ്ലാക്ക്മാന് പറഞ്ഞു. സ്വന്തം നാട്ടില് അഭയാര്ത്ഥികളായി കഴിയേണ്ടിവരുന്ന സാഹചര്യം ദു:ഖകരമാണെന്നും ബോബ് ചൂണ്ടിക്കാട്ടി. കശ്മീര് വിഷയത്തില് ഭാരതവും പാക്കിസ്ഥാനും തമ്മില് ദീര്ഘകാലമായി നിലനില്ക്കുന്ന പ്രശ്നങ്ങള് പരിഹരിക്കേണ്ടത് അനിവാര്യമാണെന്നും അദ്ദേഹം പറഞ്ഞു.
മുന്കാലങ്ങളില് കശ്മീര് വിഷയത്തില് നടന്ന ചര്ച്ചകളില് ഭാരതത്തിനും ഇസ്ലാമാബാദിനും തുല്യപിന്തുണയാണ് ലഭിച്ചിരുന്നത്. ഇന്ന് ഭാരതത്തിന്റെ നിലപാടുകളെ പിന്തുണച്ചവര്ക്ക് കൂടുതല് കയ്യടി ലഭിച്ചിരിക്കുന്നു. ഭാരതത്തിനെതിരെ ആസൂത്രിത നീക്കം നടത്തിയവര് പരാജയപ്പെടുന്നു എന്നതാണ് ഇതിലൂടെ വ്യക്തമാകുന്നത്.
