ബീജിംഗ്: വ്യാപാര രംഗത്തെ അസന്തുലിതാവസ്ഥ പരിഹരിക്കുന്നതിനായി ഇന്ത്യയും ചൈനയും വ്യവസായ പാര്‍ക്കുകള്‍ തുടങ്ങന്നത് സംബന്ധിച്ചുള്ള കരാറില്‍ ഉടനെ ഒപ്പുവെച്ചേക്കും. ഇരുരാജ്യങ്ങളും തമ്മിലുള്ള വ്യാപാര വാണിജ്യ അസന്തുലിതാവസ്ഥക്ക് പരിഹാരമായിട്ടാണ് ഇത്തരത്തിലുള്ള നീക്കമെന്ന് വിദേശകാര്യ സെക്രട്ടറി സുജാത സിംഗ് പറഞ്ഞു. ചൈനീസ് വിദേശകാര്യ സെക്രട്ടറിയുമായി നടന്ന കൂടികാഴ്ചക്ക് ശേഷമാണ് സുജാതാ സിംഗ് ഇക്കാര്യം അറിയിച്ചത്. ഇതിലൂടെ രണ്ട് രാജ്യങ്ങളിലെയും വ്യാപാരവും നിക്ഷേപവും ഉയരും. കോടിക്കണക്കിന് രൂപയുടെ നിക്ഷേപമാണ് ചൈനയില്‍ നിന്നും ഇന്ത്യ പ്രതീക്ഷിക്കുന്നത്.
വാണിജ്യമന്ത്രി നിര്‍മ്മല സീതാരാമനും ചൈനീസ് സര്‍ക്കാരുമായി ഇന്ന് ബീജിംഗില്‍ നടക്കുന്ന ചര്‍ച്ചയില്‍ വ്യവസായപാര്‍ക്ക് സംബന്ധിച്ച് രൂപരേഖ തയ്യാറാക്കും. ചൈനയുമായി 4000കോടി രൂപയുടെ വാണിജ്യ സാധ്യതകള്‍ ഉളളതായിട്ടാണ് ഇന്ത്യയുടെ കണക്കുകൂട്ടല്‍. ഉപരാഷ്‌ട്രപതി ഹമീദ് അന്‍സാരിയും ചൈനീസ് പ്രധാനമന്ത്രി ലീ കിംങുമായി നടന്ന ചര്‍ച്ചയില്‍ വ്യാപാര വ്യവസായ വര്‍ധനയാണ് മുഖ്യവിഷയമായതെന്ന് ചൈനയിലെ ഇന്ത്യന്‍ അംബാസഡര്‍ കെ. അശോക് കാന്ത അറിയിച്ചു. വിശാല അടിസ്ഥാനത്തിലുള്ള സാമ്പത്തിക പദ്ധതികള്‍ക്കും നിക്ഷേപങ്ങള്‍ക്കുമാണ് ശ്രദ്ധചെലുത്തുന്നത്.
ഉല്‍പ്പാദനമേഖലയെ ശക്തിപ്പെടുത്തി കൂടുതല്‍ തൊഴിലവസരങ്ങള്‍ സൃഷ്ടിക്കുകയും സമ്പദ് വ്യവസ്ഥയെ പ്രോത്സാഹിപ്പിക്കലുമാണ് നരേന്ദ്രമോദി സര്‍ക്കാരിന്റെ നയം. വ്യവസായ പാര്‍ക്കുകള്‍ സംബന്ധിച്ച അവസാന തീരുമാനം ചൈനീസ് വിദേശകാര്യമന്ത്രിയുടെ ഇന്ത്യാ സന്ദര്‍ശനവേളയില്‍ വിദേശകാര്യമന്ത്രി സുഷമ സ്വരാജുമായുള്ള കൂടികാഴ്ചയിലായിരിക്കും ഉണ്ടാവുക.
