വാഷിംഗ്ടണ്: ആഭ്യന്തര സംഘര്ഷം രൂക്ഷമായ ഇറാഖിലേക്ക് സൈനിക ഉപദേഷ്ടാക്കളെ അയക്കുമെന്ന് അമേരിക്കന് പ്രസിഡന്റ് ബരാക് ഒബാമ. ഇറാഖി സേനാംഗങ്ങളെ സഹായിക്കുന്നതിനു വേണ്ടിയാണ് 300 ഓളം വരുന്ന സൈനിക ഉപദേഷ്ടാക്കളെ അയക്കുന്നതെന്ന് ഒബാമ വ്യക്തമാക്കി.
കനത്ത ആക്രമണം നടക്കുന്ന ഇറാഖിന്റെ വടക്കന് മേഖലകളിലും സംയുക്ത സൈനിക കേന്ദ്രങ്ങള് തുറക്കുമെന്നും ഒബാമ പറഞ്ഞു. വിമതരുടെ നീക്കം നിരീക്ഷിച്ചുവരികയാണ്. ആവശ്യമായ ഘട്ടത്തില് സൈനിക നടപടിയുണ്ടാകും. യുദ്ധത്തിലൂടെ ഇറാഖില് മാറ്റം ഉണ്ടാക്കാനാഗ്രഹിക്കുന്നില്ലെന്നും രാഷ്ട്രീയ പരിഹാരമാണ് വേണ്ടതെന്നും ഒബാമ ചൂണ്ടിക്കാട്ടി. യു.എസ് ദേശീയ സുരക്ഷാ ഏജന്സിയുമായി ചര്ച്ച നടത്തിയ ശേഷം നടത്തിയ വാര്ത്താസമ്മേളനത്തിലാണ് ഒബാമ ഇറാഖ് നയം വ്യക്തമാക്കിയത്.
സുന്നി-ഷിയ-കുര്ദ് വിഭാഗങ്ങള്ക്ക് പ്രാതിനിധ്യമുള്ള സര്ക്കാറിന് മാത്രമേ പ്രശ്നം പരിഹരിക്കാന് കഴിയുകയുള്ളൂ. ഭിന്നതകള് മറന്ന് പ്രശ്നത്തിന് രാഷ്ട്രീയ പരിഹാരം കാണാന് ഇറാഖിലെ നേതാക്കള് ശ്രമിക്കണമെന്നും ഒബാമ ആവശ്യപ്പെട്ടു. ഇറാഖിലെ ഭരണകര്ത്താക്കളെ നിശ്ചയിക്കുന്നത് അമേരിക്കയുടെ പണിയല്ല. എന്നാല് അവിടെ സംശയാസ്പദമായി ചിലതുണ്ട്. നയങ്ങള് രൂപീകരിച്ചതില് വീഴ്ചപറ്റി. തങ്ങള് മുന്പ് മുന്നറിയിപ്പ് നല്കിയ രീതിയിലാണ് ഇറാഖിലെ നേതാക്കള് പരീക്ഷിക്കപ്പെടുന്നത്. കഴിഞ്ഞകാലത്ത് എന്തും സംഭവിച്ചിരിക്കാം. ഇപ്പോള് ശക്തമായ തീരുമാനങ്ങള് എടുക്കേണ്ട സമയമാണ്. ഇറാഖിലെ വിധി ഇപ്പോഴും ബാലന്സിലാണെന്നും ഒബാമ പറഞ്ഞു.
രാജ്യത്തെ തന്ത്ര പ്രധാന നഗരങ്ങളും ഏറ്റവും വലിയ എണ്ണ ശുദ്ധീകരണ ശാലയും ഐസ്ഐഎസ് ഭീകരര് പിടിച്ചെടുതിരുന്നു. ഈ പശ്ചാത്തലത്തില് വിമതര്ക്കെതിരെ വ്യോമാക്രമണം നടത്തണമെന്ന് ഇറാഖ് വിദേശകാര്യ മന്ത്രി അമേരിക്കയോട് ആവശ്യപ്പെട്ടിരുന്നു.
