മട്ടാഞ്ചേരി: അഗതി മന്ദിരത്തില് ഭക്ഷണം, അമ്പലങ്ങളില് വഴിപാടുകള്, ജനങ്ങള്ക്ക് മധുരപലഹാരങ്ങള്, അണികള്ക്ക് ആവേശം പകര്ന്ന് വാദ്യമേളങ്ങള്, കരിമരുന്ന് പ്രയോഗം, എല്ലാവര്ക്കും സത്യപ്രതിജ്ഞ കാണുവാന് കവലകളില് വന് സ്ക്രീനുകള്, കലാപരിപാടികള്, നൃത്തങ്ങള് നരേന്ദ്രമോദിയുടെ സത്യപ്രതിജ്ഞ ചടങ്ങും ബിജെപി നേതൃത്വ എന്ഡിഎ സര്ക്കാര് അധികാര പ്രവേശനവും ഉത്സവമാക്കി മാറ്റുവാന് പശ്ചിമകൊച്ചി ഒരുങ്ങിക്കഴിഞ്ഞു. ഗുജറാത്തി സമാജവും വടക്കേയിന്ത്യന് സമൂഹവും മോദിയുടെ സത്യപ്രതിജ്ഞ ചടങ്ങ് വേളയില് പ്രത്യേക പ്രാര്ത്ഥനയും ഭവനങ്ങളില് പൂജയും ഒരുക്കിയിരിക്കയാണ് സ്വതന്ത്ര ഇന്ത്യയുടെ ചരിത്രത്താളുകളില് നരേന്ദ്രമോദി സര്ക്കാരിന്റെ സത്യപ്രതിജ്ഞ ചടങ്ങ് വന് സംഭവമായി മാറും. മലയാളികള്ക്കിടയില് എല്ലാം മറന്നുള്ള ആഘോഷമാക്കി മാറ്റുവാനാണ് ബിജെപിയും മോദി അഭ്യുദയകാംക്ഷികളും ഒരുങ്ങിയിരിക്കുന്നത്.
“നരേന്ദ്രമോദി സര്ക്കാര് അധികാരത്തിലേറുന്ന ഇന്ന് പശ്ചിമകൊച്ചിയുടെ വിവിധ ഭാഗങ്ങളില് പ്രകടനങ്ങളും ആഘോഷപരിപാടികളും അരങ്ങേറും. പായസം, ലഡ്ഡു, പഴം, മിഠായി, നമോ ചായ തുടങ്ങിയവ വിതരണം ചെയ്തും കലാപരിപാടികള്, പടക്കംപൊട്ടിച്ചും, വാദ്യമേളങ്ങളൊരുക്കിയുമാണ് ആഘോഷം. ചെറളായി, അമരാവതി, വെളി, പാണ്ടിക്കുടി, പാലസ് റോഡ്, ഗുജറാത്തി റോഡ്, കൂവപ്പാടം, ആനവാതില്, തോപ്പുംപടി, പള്ളുരുത്തി വെളി അഗതിമന്ദിരം, കണ്ണമാലി, ചെല്ലാനം, കുമ്പളങ്ങി എന്നിവിടങ്ങളില് വിപുലമായ ഒരുക്കങ്ങളാണ് ബിജെപി നടത്തിയിരിക്കുന്നത്. പള്ളുരുത്തി കൊച്ചിന് കോര്പ്പറേഷന് വക അഗതിമന്ദിരത്തില് അന്തേവാസികള്ക്ക് ഭക്ഷണം നല്കുന്നതോടൊപ്പം പാട്ടും നൃത്തവുമൊരുക്കി ആനന്ദം പകരുന്ന പരിപാടികളും അരങ്ങേറും. കൗണ്സിലറും ബിജെപി സംസ്ഥാന ഉപാധ്യക്ഷയുമായ ശ്യാമള പ്രഭു ജില്ലാ പ്രസിഡന്റ് അഡ്വ.പി.ജെ.തോമസ് എന്നിവര് ചടങ്ങില് മുഖ്യാതിഥികളാകും. പള്ളുരുത്തി വെളിയില് സത്യപ്രതിജ്ഞ ചടങ്ങ് വീക്ഷിക്കാന് ജനങ്ങള്ക്കായി പ്രത്യേകം വലിയ സ്ക്രീന് തയ്യാറാക്കിയിട്ടുണ്ട്. കൂടാതെ പല മേഖലയിലും കവലകളില് വന് സ്ക്രീനുകള് സജ്ജമാക്കി മോദി സര്ക്കാര് അധികാരം ഏറ്റെടുക്കല് ചടങ്ങ് വീക്ഷിക്കാന് അവസരമൊരുക്കുകയും ചെയ്തതായി പി.ബി.സുജിത് പറഞ്ഞു.
പശ്ചിമകൊച്ചിയിലെ ക്ഷേത്രങ്ങളില് പ്രത്യേക പൂജയും വഴിപാടും നടത്തും. കൊച്ചി ടിഡി ക്ഷേത്രത്തില് ഭഗവാന്റെ പ്രധാന നൈവേദ്യമായ മുളിക്കപ്പ സമര്പ്പണം, പായസം വിതരണം, അമരാവതി അമ്മന്കോവില് ക്ഷേത്രത്തില് ചുറ്റുവിളക്ക്, അലങ്കാരം, കരിമരുന്നു പ്രയോഗം, പഴയന്നൂര് ഭഗവതി ക്ഷേത്രം, പള്ളിയറക്കാവ് ക്ഷേത്രം, അഴകിയ കാവ് ക്ഷേത്രം, ഭവാനീശ്വര ക്ഷേത്രം, കണ്ണങ്ങാട്ട് ക്ഷേത്രം, വെങ്കടാചലപതി ക്ഷേത്രം, തിരുമല ക്ഷേത്രം എന്നിവിടങ്ങളില് അര്ച്ചന, നൈവേദ്യം വഴിപാടുകളും മോദി ആരാധകര് നടത്തിയിട്ടുണ്ട്. ആഘോഷ ചടങ്ങുകള്ക്ക് ബിജെപി കൊച്ചി നിയോജകമണ്ഡലം വൈസ് പ്രസിഡന്റ് ആര്.രാമരാജ്, സെക്രട്ടറിമാരായ പി.ഡി.പ്രവീണ്, എസ്.രാജേഷ്, തെരഞ്ഞെടുപ്പ് ചെയര്മാന് അഡ്വ.കെ.വിജയചന്ദ്ര മേനോന്, വിമലാ രാധാകൃഷ്ണന്, സംസ്ഥാന സമിതിയംഗം കെ.ശശിധരന്, എസ്.കൃഷ്ണ കുമാര്, ശിവകുമാര് കമ്മത്ത്, പ്രഭാകര പണിക്കര് തുടങ്ങിയവര് നേതൃത്വം നല്കും.
