വൈക്കം: നഗരസഭയുടെ കീഴിലുള്ള ടൗണ്ഹാള് ലേലത്തിലെ തട്ടിപ്പിനെതിരെ വൈക്കം നഗരസംരക്ഷണ സമിതി ഓംബുഡ്സ്മാന് പരാതി നല്കിയശേഷം ചേര്ന്ന നഗരസഭാ കൗണ്സില് യോഗങ്ങള് കരാറുകാരനുവേണ്ടി അട്ടിമറിക്കപ്പെട്ടതായി ആക്ഷേപം. 25ന് ചേര്ന്ന കൗണ്സില് യോഗം അട്ടിമറിക്കുന്നതിനും കരാറുകാരനുവേണ്ടി ഗ്രൂപ്പ് യോഗം ചേരുകയും ചെയ്ത കോണ്ഗ്രസ് കൗണ്സിലര്മാര്ക്കെതിരെ പാര്ട്ടി നേതൃത്വം നടപടി സ്വീകരിക്കണമെന്ന് നഗരസംരക്ഷണസമിതി ആവശ്യപ്പെട്ടു. കൗണ്സില് യോഗത്തിന്റെ അജണ്ടയിലുണ്ടായിരുന്നിട്ടും ടൗണ്ഹാള് തട്ടിപ്പില് തീരുമാനമെടുക്കാന് കഴിയാത്തവിധം കരാറുകാരനുവേണ്ടി ഒരു വിഭാഗം കോണ്ഗ്രസുകാരായ കൗണ്സിലര്മാര് രംഗത്തു വന്നിരിക്കുകയാണെന്ന് സംരക്ഷണസമിതി ആരോപിക്കുന്നു. ഈ പ്രവര്ത്തനത്തിലൂടെ ഇവര് ജനങ്ങളെ വഞ്ചിച്ചിരിക്കുകയാണ്. കരാറുകാരനുവേണ്ടി നിലകൊള്ളുന്ന ഒരു വിഭാഗം കൗണ്സിലര്മാര്ക്കെതിരെ നടപടി സ്വീകരിച്ച് മാതൃക കാണിക്കാന് പാര്ട്ടി നേതൃത്വം തയ്യാറാകണമെന്ന് നഗരസംരക്ഷണ സമിതി ആവശ്യപ്പെട്ടു.
നഗരസംരക്ഷണസമിതി ചെയര്മാന് അഡ്വ. പി.കെ. ഷാജി അദ്ധ്യക്ഷത വഹിച്ചു. അഡ്വ. പ്രകാശന് ഉദ്ഘാടനം ചെയ്തു. കെ.കെ. മോഹനന്, കളത്തില് രാജു എന്നിവര് പ്രസംഗിച്ചു.
