കോട്ടയം: ഈസ്റ്റര്‍ മനുഷ്യന്റെ ഹൃദയത്തില്‍ പ്രത്യാശയുടെ വെളിച്ചം പകരുന്നതായി മന്ത്രി കെ. സി ജോസഫ് പറഞ്ഞു. കാത്തലിക് ഫെഡറേഷന്‍ ഓഫ് ഇന്ത്യ, റെഡ്‌ക്രോസ്, നവജീവന്‍, സാന്ത്വനം, സെന്‍ട്രല്‍ ലയണ്‍സ് ക്ലബ്, മാന്നാനം കെഇ സ്‌കൂല്‍, എസ്എച്ച് നേഴ്‌സിംഗ് സ്‌കൂള്‍ എന്നിവയുടെ ആഭിമുഖ്യത്തില്‍ നടന്ന ഈസ്റ്റര്‍ ആഘോഷം ഉദ്ഘാടനം ചെയ്യുകയായിരുന്നു അദ്ദേഹം. നന്മയുടെ പാതയിലൂടെ നീങ്ങാനാണ് ഈസ്റ്റര്‍ നല്‍കുന്ന സന്ദേശം. ഇതു പലരും മറക്കുന്നുവെന്നും മന്ത്രി പറഞ്ഞു.
ക്രിസ്തു കാട്ടിതന്ന വെളിച്ചം നന്മയുടെതാണെന്നും ആ പ്രകാശമാണ് മനുഷ്യരാശിക്കു പാതയൊരുക്കുന്നതെന്നും ആര്‍ച്ച് ബിഷപ് മാര്‍ ജോസഫ് പെരുന്തോട്ടം ഈസ്റ്റര്‍ സന്ദേശത്തില്‍ പറഞ്ഞു. ഓരോ വാക്കും പ്രവര്‍ത്തിയും കുറ്റമറ്റതാകണം. നന്മയുടെ വീഥികളിലൂടെ ചരിക്കുന്നവനേ ഉയര്‍ച്ച ഉണ്ടാകുകയുള്ളുവെന്നും അദ്ദേഹം കൂട്ടിച്ചേര്‍ത്തു.സിഎഫ്‌ഐ ദേശീയ പ്രസിഡന്റ് അഡ്വ. പി.പി. ജോസഫ് അദ്ധ്യക്ഷത വഹിച്ചു.
അതിരമ്പുഴ ഫൊറോന പള്ളി വികാരി ഫാ. മാണി പുതിയിടം ആമുഖ പ്രസംഗം നടത്തി. നഗരസഭാ ചെയര്‍മാന്‍ എം.പി.സന്തോഷ്‌കുമാര്‍, ടോമി കല്ലാനി, അഡ്വ. സുനില്‍ സി. കുര്യന്‍, ഫാ. ജയിംസ് മുല്ലശേരി, മാത്യു കൊല്ലമലക്കരോട്ട്, ഷാജിലാല്‍ എന്നിവര്‍ പ്രസംഗിച്ചു. ജീവകാരുണ്യ പ്രവര്‍ത്തകരായ പാലാ സ്‌നേഹഭവന്‍ സ്ഥാപക ഡയറക്ടര്‍ എബ്രഹാം കൈപ്പന്‍പ്ലാക്കല്‍, കാഞ്ഞിരപ്പള്ളി നല്ലഇടയന്‍ ആശ്രമം ഡയറക്ടര്‍ ഫാ. റോയി വടക്കേല്‍, നവജീവന്‍ മാനേജിംഗ് ട്രസ്റ്റി പി.യു. തോമസ്, മിഷണറീസ് ഓഫ് ചാരിറ്റീസ് നടത്തുന്ന അഭയഭവന്‍ ഡയറക്ടര്‍ സിസ്റ്റര്‍ ആല്‍ബര്‍ട്ടീന, പാമ്പാടി ആശ്വാസഭവന്‍ ഡയറക്ടര്‍ ജോസഫ് മാത്യു, സാന്ത്വനം ഡയറക്ടര്‍ ആനി ബാബു എന്നിവരെ മന്ത്രി കെ.സി. ജോസഫ് ആദരിച്ചു. കെ.ജി. പീറ്ററുടെ ക്രിസ്തീയ ഭക്തിഗാനമേളയും അരങ്ങേറി.
പുതുപ്പള്ളി എക്യുമെനിക്കല്‍ ഫെലോഷിപ്പിന്റെ സംയുക്ത ഈസ്റ്റര്‍ ആഘോഷം 23ന് 3.30ന് സെന്റ് പോള്‍സ് ഹോറേബ് മാര്‍ത്തോമ്മാ പള്ളിയില്‍ പ്രസിഡന്റ് ഫാ. ജേക്കബ് ചെറിയാന്‍ മണ്ണൂരിന്റെ അധ്യക്ഷതയില്‍ നടത്തും. എറികാട് മോറിയ മാര്‍ത്തോമ്മ ചര്‍ച്ച് വികാരി റവ. ജോര്‍ജ് എം.കുരുവിള സന്ദേശം നല്‍കും.
