ആലുവ: മെട്രോ റെയില് അങ്കമാലിവരെ നീട്ടണമെന്ന ആവശ്യം ശക്തമാക്കുമെന്ന് ബിജെപി ചാലക്കുടി പാര്ലമെന്റ് മണ്ഡലം സ്ഥാനാര്ത്ഥി ബി.ഗോപാലകൃഷ്ണന് പറഞ്ഞു. ആലുവ മാര്ക്കറ്റിലും പരിസരത്തും ടൗണിന്റെ വിവിധ ഭാഗങ്ങളിലും വോട്ടര്മാരെ നേരില്ക്കണ്ട് വോട്ട് അഭ്യര്ത്ഥിച്ചശേഷം മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.
ചാലക്കുടി മണ്ഡലത്തിലെ വികസനപ്രവര്ത്തനങ്ങള്ക്ക് മുന്തൂക്കം നല്കി നടപ്പിലാക്കാന് കെ.പി.ധനപാലന് കഴിഞ്ഞില്ല. കാലടി, മലയാറ്റൂര്, കൊടുങ്ങല്ലൂര് പ്രദേശങ്ങള് ടൂറിസത്തിന് വളരെയേറെ സാധ്യതയുള്ള പ്രദേശങ്ങളാണ്. ഈ പ്രദേശം ടുറിസം കേന്ദ്രമായി പ്രഖ്യാപിക്കാന് തയ്യാറാകണമെന്ന് അദ്ദേഹം പറഞ്ഞു.
ചാലക്കുടി പാര്ലമെന്റ് മണ്ഡലത്തില് വ്യവസായം എല്ലാംതന്നെ തകര്ച്ചയുടെ വക്കിലാണ്. മുന് എംപിക്ക് നാടിന്റെ വികസനത്തിനുവേണ്ടി ഒന്നും ചെയ്യാന് കഴിഞ്ഞില്ലെന്ന് അദ്ദേഹം പറഞ്ഞു. ബിജെപി നിയോജകമണ്ഡലം പ്രസിഡന്റ് എം.എന്.ഗോപി, അഡ്വ. എ.കെ.നസീര്, അഡ്വ. പി.കൃഷ്ണദാസ്, കെ.ജി.ഹരിദാസ്, എ.സി.സന്തോഷ് കുമാര് എന്നിവര് സ്ഥാനാര്ത്ഥിയോടൊപ്പമുണ്ടായിരുന്നു.
