വൈക്കം: മാതാ അമൃതാനന്ദമയീമഠത്തിനെതിരെ നടത്തുന്ന കുപ്രചരണങ്ങള് ദുഷ്ടലാക്കോടെയാണെന്ന്് ധീവരസഭ ജനറല് സെക്രട്ടറി ദിനകരന് പറഞ്ഞു. ധീവരസഭ രൂപീകരണ ദിനാഘോഷത്തോടനുബന്ധിച്ച് നടത്തിയ വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം. ചില മതസ്ഥാപനങ്ങള്ക്ക് വിദേശ രാജ്യങ്ങളില്നിന്ന് വരുന്ന സാമ്പത്തിക സ്രോതസിനെക്കുറിച്ച് അന്വേഷിക്കാന് തയ്യാറാകാതെ മഠത്തിനെതിരെ നടത്തുന്ന അപവാദങ്ങള് ഗൂഡലക്ഷ്യത്തോടയുളളതാണ്. മഠത്തിനെതിരെ ജമാ-അത്തെ ഇസ്ലാമി, എന്ഡിഎഫ് തുടങ്ങിയ സംഘടനകള് കുപ്രചരണം നടത്തുകയാണ്. സാമൂഹ്യപ്രവര്ത്തനം നടത്തുന്ന മഠത്തിന്റെ സേവനങ്ങള് രാഷ്ടീയ നേതാക്കള് കണ്ടില്ലെന്ന് നടിക്കുകയാണ്.
കായല് കൈയ്യേറ്റങ്ങള്ക്കെതിരെ സഭ സമരം നടത്തും. ഉള്നാടന് കായലോരങ്ങള് സര്ക്കാര് സംരക്ഷിക്കണമെന്നും ആലപ്പുഴ ജനറല് ബോഡിയില് രാഷ്ടീയ നിലപാട് വ്യക്തമാക്കുമെന്നും അദ്ദേഹം അറിയിച്ചു. സീതാറാം ആഡിറ്റോറിയത്തില് ഇന്ന് രാവിലെ 10 ന് ധീവരസഭ രൂപീകരണ ദിനാഘോഷ സമ്മേളനം മന്ത്രി കെ.എം.മാണി ഉദ്ഘാടനം ചെയ്യും. ജോസ്.കെ.മാണി എം.പി, മുനിസിപ്പല് ചെയര്പേഴ്സണ് ശ്രീലതാ ബാലചന്ദ്രന്, ബോക്ക് പഞ്ചായത്ത് പ്രസിഡന്റ് കെ.വിജയന് തുടങ്ങിയവര് പ്രസംഗിക്കും.
