സിലിഗുഡി: കഴിഞ്ഞ വര്ഷം കൊച്ചിയില് കൈവിട്ട സന്തോഷ് ട്രോഫി കിരീടം സ്വന്തമാക്കാന് തയ്യാറെടുത്ത കേരളത്തിന്റെ ആദ്യപോരാട്ടം ഇന്ന്. ഗ്രൂപ്പ് എയില് മിസോറാമാണ് ആദ്യ പോരാട്ടത്തില് കേരളത്തിന്റെ എതിരാളികള്. കാഞ്ചന്ജംഗ സ്റ്റേഡിയത്തില് വൈകിട്ട് 6.15നാണ് പോരാട്ടം. ഇന്ന് നടക്കുന്ന ഉദ്ഘാടന പോരാട്ടത്തില് ഉത്തരാഖണ്ഡ് മഹാരാഷ്ട്രയുമായി ഏറ്റുമുട്ടും. നിലവിലെ ചാമ്പ്യന്മാരായ സര്വ്വീസസാണ് ഗ്രൂപ്പിലെ അഞ്ചാമത്തെ ടീം. മഹാരാഷ്ട്രയും സര്വ്വീസസുമാണ് കേരളത്തിന് ഗ്രൂപ്പ് ബിയില് വന് വെല്ലുവിളി ഉയര്ത്തുക. കഴിഞ്ഞവര്ഷം കൊച്ചിയില് നടന്ന ഫൈനലില് സര്വ്വീസസിനോട് ഷൂട്ടൗട്ടിലാണ് കേരളം പരാജയപ്പെട്ടത്.
ഗ്രൂപ്പ് ബി മരണഗ്രൂപ്പാണ്. ആതിഥേയരായ ബംഗാള്, കരുത്തരായ ഗോവ, റെയില്വേസ്, പഞ്ചാബ്, തമിഴ്നാട് എന്നീ ഇന്ത്യന് ഫുട്ബോളിലെ വമ്പന്മാരാണ് ഈ ഗ്രൂപ്പില് ഉള്പ്പെടുന്നത്. ബംഗാളും ഗോവയും പഴയ പ്രതാപത്തിന്റെ നിഴല് മാത്രമാണെങ്കിലും കിരീട പോരാട്ടത്തില് മുന്നിരക്കാരാണ്. ദക്ഷിണമേഖലാ യോഗ്യതാ പോരാട്ടത്തില് കേരളത്തെ പിന്തള്ളി ഒന്നാം സ്ഥാനക്കാരായാണ് തമിഴ്നാട് യോഗ്യത നേടിയത്.
ടൂര്ണമെന്റിന്റെ ഘടന പരിഷ്കരിച്ചശേഷം നടക്കുന്ന ആദ്യ സന്തോഷ് ട്രോഫിയെന്ന പ്രത്യേകത ഇന്ന് ആരംഭിക്കുന്ന അറുപത്തെട്ടാം പതിപ്പിനുണ്ട്.
അഞ്ച് മേലകളില്നിന്ന് യോഗ്യതാ മത്സരം ജയിച്ചെത്തിയ പത്തു ടീമുകളാണ് കിരീടം തേടിയിറങ്ങുന്നത്. അഞ്ചു ടീമുകള് വീതമുള്ള രണ്ടു ഗ്രൂപ്പുകളായാണ് മല്സരം. ഗ്രൂപ്പിലെ ആദ്യ രണ്ട് സ്ഥാനക്കാര് സെമിയിലേക്ക് യോഗ്യത നേടും.
യോഗ്യതാ റൗണ്ടിലെ അവസാന പോരാട്ടത്തില് കര്ണാടകയെ ഇഞ്ച്വറി സമയത്ത് തോല്പ്പിച്ചാണ് കേരളം സിലിഗുഡിയിലേക്ക് ടിക്കറ്റ് സ്വന്തമാക്കിയത്. സിലിഗുഡിയിലെ തണുപ്പിനെയാണ് കേരളം ആദ്യം അതിജീവിക്കേണ്ടത്. ഇതിനായി യോഗ്യതാ റൗണ്ടിനുശേഷം 10 ദിവസം കേരളം മൂന്നാറിലെ ഹായ് ആള്ട്ടിറ്റിയൂഡ് ട്രെയിനിംഗ് സെന്ററില് തീവ്രപരിശീലനം നടത്തിയ ശേഷമാണ് കേരളം സിലിഗുഡിയിലെത്തിയിരിക്കുന്നത്.
26ന് ഉച്ചക്ക് 2.30ന് നടക്കുന്ന രണ്ടാം മത്സരത്തില് ഉത്തരാഖണ്ഡുമായും മാര്ച്ച് 2ന് മഹാരാഷ്ട്രയുമായും മാര്ച്ച് 4ന് നിലവിലെ ചാമ്പ്യന്മാരായ സര്വ്വീസസുമായും കേരളം ഏറ്റുമുട്ടും.
