ലണ്ടന്: ഇംഗ്ലീഷ് പ്രീമിയര് ലീഗ് കീരിടത്തിനുള്ള അങ്കം മുറുകുന്നു. 24-ാം റൗണ്ടില് മാഞ്ചസ്റ്റര് സിറ്റിയെ എതിരില്ലാത്ത ഒരു ഗോളിന് ചെല്സി വീഴ്ത്തി. സെര്ബിയന് സ്ട്രൈക്കര് ബ്രാനിസ്ലാവ് ഇവാനോവിച്ചാണ് സിറ്റിയുടെ നെഞ്ചു തകര്ത്തഗോള് കുറിച്ചത്. ഇതോടെ പോയിന്റ് നിലയില് നീലപ്പട (53) സിറ്റിക്ക് ഒപ്പമെത്തി. ടേബിളില് സിറ്റി രണ്ടാമതും ചെല്സി മൂന്നാമതുമാണ്. ഗോള് ശരാശരിയുടെ പിന്ബലത്തിലാണ് സിറ്റി മുന്നില് നില്ക്കുന്നത്. ഒന്നാമതുള്ള ആഴ്സനലിന് 55 പോയിന്റുകളുണ്ട്.
സിറ്റിയുടെ തട്ടകത്തില് ചെല്സി പിടിച്ചെടുത്തത് അര്ഹിച്ച ജയം. കൗണ്ടര് അറ്റാക്കുകളിലൂടെയും മികച്ച പ്രതിരോധതന്ത്രങ്ങളിലൂടെയും ചെല്സി കളംവാണു. ആദ്യ ഇരുപതു മിനിറ്റില് സിറ്റിക്കായിരുന്നു മുന്തൂക്കം. നിരവധി മുന്നേറ്റങ്ങള് അവര് നടത്തി. യായാ ടൂറെ അതിലെ ഭൂരിഭാഗത്തിനും ചരടുവലിച്ചു. പത്താം മിനിറ്റില് അലക്സാണ്ടര് കൊളറോവ് ബോക്സിനുള്ളിലേക്ക് തൊടുത്ത അപകടകരമായ ക്രോസ് ടൂറെയ്ക്ക് എത്തിപ്പിടിക്കാനായില്ല. പിന്നാലെ ചെല്സിയുടെ പെനാല്റ്റി ഏരിയയിലേക്ക് ഒറ്റയ്ക്കു കുതിച്ച ടൂറെ നല്കിയ പാസ് ഡേവിഡ് സില്വയും പുറത്തേക്കടിച്ചു. തുടര്ന്ന് നല്ല പൊസിഷനില് ലഭിച്ച ഫ്രീ കിക്ക് ചെല്സിയുടെ ഡേവിഡ് ലൂയീസ് തുലച്ചു. റാമിറസും സമാന പ്രവൃത്തി ആവര്ത്തിച്ചപ്പോള് ചെല്സിക്ക് വീണ്ടും നിരാശ. എന്നാല് അധികം വൈകാതെ ചെല്സി മുന്നിലെത്തി. റാമിറസിന്റെ ഷോട്ട് സിറ്റി ഗോളി ജോ ഹാര്ട്ട് തട്ടിത്തെറിപ്പിച്ചു. പന്തു പിടിച്ചെടുത്ത ഇവാനോവിച്ച് (32-ാം മിനിറ്റ്) പെനാല്റ്റി ഏരിയയിലെ കൂട്ടപ്പൊരിച്ചിലിനിടെ ഇടംകാലുകൊണ്ട് പന്ത് ഗോള് വര കടത്തി (1-0). ഒന്നാം പകുതി അവസാനിക്കാന് നിമിഷങ്ങള് ബാക്കി നില്ക്കെ സാമുവല് എറ്റുവിന്റെ ഷോട്ട് പോസ്റ്റില് തട്ടി മടങ്ങി. അതല്ലെങ്കില് സിറ്റിയുടെ നില കൂടുതല് പരിതാപകരമായേനെ.
രണ്ടാം പകുതിയുടെ തുടക്കത്തില് സിറ്റിയുടെ പ്രതിരോധം ആടിയുലഞ്ഞു. വില്യന് ചെല്സിക്കുവേണ്ടി ഒരു തവണ ഗോളിനടുത്തെത്തി. നെമാന്ജ മാറ്റിച്ചിന്റെ ലോങ്ങ് റേഞ്ചിനും പോസ്റ്റ് പ്രതിബന്ധം തീര്ക്കുമ്പോള് സിറ്റിക്ക് മറ്റൊരാശ്വാസം. 67-ാം മിനിറ്റില് വില്യന്റെ കോര്ണറില് ചെല്സിക്കുവേണ്ടി ഗ്യാരി കാഹില് തൊടുത്ത ഹെഡ്ഡറും പോസ്റ്റില് ഉരുമി മടങ്ങി. അതിനിടെ സിറ്റിക്ക് ലഭിച്ച ഫ്രീ കിക്ക് 20വാര അകലെ നിന്ന് കൊളറോവ് ഗോളിലേക്ക് ഷൂട്ട് ചെയ്തെങ്കിലും പീറ്റര് ചെക്ക് തട്ടിയകറ്റി. അവസാന നിമിഷങ്ങളില് സമനിലയ്ക്കു വേണ്ടി സിറ്റി കിണഞ്ഞു ശ്രമിച്ചു. പക്ഷേ ചെക്കും ചെല്സി പ്രതിരോധവും പാറ പോലെ ഉറച്ചുനിന്നപ്പോള് മാനുവേല് പെല്ലഗ്രിനിയുടെ കുട്ടികള്ക്ക് മുട്ടുകുത്തേണ്ടിവന്നു.
