ലണ്ടന്: ഇംഗ്ലീഷ് പ്രീമിയര് ലീഗില് ആഴ്സണല് വീണ്ടും ഒന്നാം സ്ഥാനത്ത് തിരിച്ചെത്തി. ഞായറാഴ്ച രാത്രി നടന്ന പോരാട്ടത്തില് പ്രീമിയര് ലീഗില് 16-ാം സ്ഥാനക്കാരായ ക്രിസ്റ്റല് പാലസിനെ മറുപടിയില്ലാത്ത രണ്ട് ഗോളുകള്ക്ക് തകര്ത്താണ് മാഞ്ചസ്റ്റര് സിറ്റിയില് നിന്നും ആഴ്സണല് ഒന്നാം സ്ഥാനം പിടിച്ചെടുത്തത്. കഴിഞ്ഞയാഴ്ച സതാമ്പ്ടനോട് സമനിലയില് കുടുങ്ങിയതോടെയാണ് ആഴ്സണലിന് ലീഗില് ഒന്നാം സ്ഥാനം നഷ്ടമായിരുന്നത്. മറ്റൊരു മത്സരത്തില് വെസ്റ്റ് ബ്രോംവിച്ച് കരുത്തരായ ലിവര്പൂളിനെ സമനിലയില് തളച്ചു. ഇരുടീമുകളും ഓരോ ഗോള് നേടി.
24 കളികളില് നിന്ന് ആഴ്സണലിന് 55 പോയിന്റുകളാണുള്ളത്. ഒരു മത്സരം കുറച്ചു കളിച്ച മാഞ്ചസ്റ്റര് സിറ്റിക്ക് 23 കളികളില് നിന്ന് സിറ്റിക്ക് 53 പോയിന്റുണ്ട്. അത്രയും മത്സരങ്ങളില് നിന്ന് 50 പോയിന്റുള്ള ചെല്സിയാണ് മൂന്നാമത്. വെസ്റ്റ് ബ്രോംവിച്ചുമായി സമനില വഴങ്ങേണ്ടിവന്ന ലിവര്പൂള് 47 പോയിന്റുമായി നാലാം സ്ഥാനത്ത് തുടരുകയാണ്.
ആഴ്സണലിന്റെ തട്ടകമായ എമിറേറ്റ്സ് സ്റ്റേഡിയത്തില് നടന്ന പോരാട്ടത്തില് ഓക്സ്ലെയ്ഡ് ചേംബര്ലെയ്നിന്റെ ഇരട്ടഗോളിലാണ് ക്രിസ്റ്റല് പാലസിനെ മറികടന്നത്. ഗോള്രഹിതമായ ആദ്യപകുതിക്കുശേഷം 47, 73 മിനിറ്റുകളിലായിരുന്നു ഗോളുകള്. ചേംബര്ലെയ്ന് ഈ സീസണില് ഇതാദ്യമായാണ് ലക്ഷ്യം കാണുന്നത്.
മത്സരത്തിലുടനീളം ആധിപത്യം പുലര്ത്തിയ ആഴ്സണല് ഓസിലിന്റെയും പൊഡോള്സ്കിയുടെയും ഗിറൗഡിന്റെയും നേതൃത്വത്തില് നിരവധി ആക്രമണങ്ങള് എതിര് ഗോള്മുഖത്തേക്ക് നടത്തിയെങ്കിലും ഗോള് നേടാന് കഴിഞ്ഞില്ല. എന്നാല് രണ്ടാം പകുതി ആരംഭിച്ച് രണ്ട് മിനിറ്റായപ്പോഴേക്കും ആഴ്സണല് ക്രിസ്റ്റല് പാലസ് പ്രതിരോധം പൊട്ടിച്ച് ആദ്യ നിറയൊഴിച്ചു. സാന്റി കാസറോള നീട്ടിയെറിഞ്ഞ ത്രോബോള് പിടിച്ചെടുത്ത് അലക്സ് ചേംബര്ലെയ്ന് ഇടംകാലുകൊണ്ട് തൊടുത്ത ഷോട്ടാണ് വലയില് കയറിയത്. തുടര്ന്നും നിരവധി മുന്നേറ്റങ്ങള് നടത്തിയ ആഴ്സണല് 73-ാം മിനിറ്റില് ലീഡ് ഉയര്ത്തി. ഇത്തവണ ഒളിവര് ഗിറൗഡിന്റെ പാസില് നിന്നാണ് ചേംബര്ലെയ്ന് തന്റെ രണ്ടാം ഗോള് നേടിയത്.
വെസ്റ്റ് ബ്രോംവിച്ചിനെതിരായ മത്സരത്തില് ഡാനിയേല് സ്റ്ററിഡ്ജിലൂടെ ലിവര്പൂളാണ് ആദ്യം മുന്നിലെത്തിയത്. 24-ാം മിനിറ്റില് ലൂയി സുവാരസിന്റെ പാസില് നിന്ന് സ്റ്ററിഡ്ജ് ഇടംകാലുകൊണ്ട് പായിച്ച ഷോട്ടാണ് വലയില് കയറിയത്. എന്നാല് 67-ാം മിനിറ്റില് ബോക്സിന് പുറത്തുനിന്ന് വിക്ടര് അനിചെബെ ഉതിര്ത്ത തകര്പ്പന് ഷോട്ടാണ് ലിവര്പൂള് വല കുലുക്കിയത്. ഈ സമനിലയോടെ 23 പോയിന്റായ വെസ്റ്റ് ബ്രോംവിച്ച് പതിനാറാം സ്ഥാനത്തേക്ക് കയറി. ഫിബ്രവരി എട്ടിന് സ്വന്തം ഗ്രൗണ്ടില് ആഴ്സണലുമായാണ് ലിവര്പൂളിന്റെ അടുത്ത മത്സരം.
