ആലുവ: കുളമ്പ് രോഗത്തെതുടര്ന്ന് കന്നുകാലി ചന്തകള് പ്രവര്ത്തിക്കുന്നതിനും അന്യസംസ്ഥാനങ്ങളില് നിന്നും കന്നുകാലികളെകൊണ്ടുവരുന്നതിനും നിയന്ത്രണങ്ങളേര്പ്പെടുത്തിയിട്ടുണ്ടെങ്കിലും ഇതെല്ലാം കടലാസിലൊതുങ്ങുന്നു. നാടന് കന്നുകാലികളെന്ന വ്യാജേനയാണ് ഇവയ്ക്കൊപ്പം തമിഴ്നാട്ടില് നിന്നുള്ള കന്നുകാലികളെയും കുത്തിനിറച്ച് വാഹനങ്ങളെത്തുന്നത്. രാത്രി കാലങ്ങളില് ഏതാണ്ട് മുപ്പത് ലോറിയിലേറെ കന്നുകാലികളാണ് ഇത്തരത്തില് ആലുവ- അങ്കമാലി- പെരുമ്പാവൂര് മേഖലകളിലേക്കായി എത്തിയത്. കേരളത്തിലേക്ക് കന്നുകാലികളെ കുടുതലായി കൊണ്ടുവരുന്നത് പാലക്കാട്ടെ വാണിയംകുളം, കുഴല്മന്ദം, പെരുമ്പിലായി എന്നിവിടങ്ങളിലെ മാര്ക്കറ്റുകളില് നിന്നാണ്.
ഈ മാര്ക്കറ്റുകളിലേക്ക് കന്നുകാലികളേറെയുമെത്തുന്നത് തമിഴ്നാട്ടില്നിന്നും നേരായ വഴിയിലൂടെ ഇപ്പോള് കന്നുകാലികളെ കൊണ്ടുവരാന് കഴിയുന്നില്ല. ഇതേതുടര്ന്നാണ് രോഗം വന്നകന്നുകാലികളെയും മറ്റും ഊട്വഴികളിലൂടെ കേരളത്തിലേക്ക് എത്തിക്കുന്നത്. പാലക്കാട്ടെയും തൃശൂരിലേയും കന്നുകാലി ചന്തകളില് നിലവില് വില്പ്പനയ്ക്കെത്തുന്നത് നാടന് കന്നുകാലികളാണ്. എന്നാല് ഇത് വളരെ വേഗത്തില് വിറ്റഴിക്കപ്പെടുകയും ചെയ്യുന്നു. മാത്രമല്ല ആവശ്യക്കാര് ധാരാളമായതിനാല് ചന്തയ്ക്കുമുമ്പ് തന്നെ ഇവകൂടിയവിലയ്ക്ക് വില്ക്കുകയും ചെയ്യുന്നു.
