ആലുവ: യോഗക്ഷേമസഭ എറണാകുളം ജില്ലാ സഭയുടെ കലാമേളയായ ‘നവനീതം-13’ ആലുവ ചീരക്കട ഭഗവതിക്ഷേത്രം ഹാളിലും വിദ്യാധിരാജ വിദ്യാഭവന്‍ സ്കൂളിലും ആരംഭിച്ചു. രാവിലെ 9ന്‌ സംസ്ഥാന വൈസ്‌ പ്രസിഡന്റ്‌ ടി.ആര്‍.വി.നമ്പൂതിരിപ്പാട്‌, ഉളിയന്നൂര്‍ വിഷ്ണുശങ്കറിന്റെ പഞ്ചവാദ്യത്തിന്റെ അകമ്പടിയോടെ പതാക ഉയര്‍ത്തി. ബാബു നമ്പൂതിരി കലാമേള ഉദ്ഘാടനം നിര്‍വഹിച്ചു.
അന്‍വര്‍ സാദത്ത്‌ എംഎല്‍എ സ്മരണിക പ്രകാശനം നടത്തി. കെ.പി.ധനപാലന്‍ എംപി യോഗത്തില്‍ സന്നിഹിതനായിരുന്നു. സംസ്ഥാന പ്രസിഡന്റ്‌ കാളിദാസ ഭട്ടതിരി സീഡ്‌ പ്രതിജ്ഞ ചൊല്ലിക്കൊടുക്കുന്നതിന്‌ മുമ്പ്‌ പരിസ്ഥിതി പ്രവര്‍ത്തകനും വൃക്ഷ-മിത്ര അവാര്‍ഡ്‌ ജേതാവുമായ സീതാരാമന്‍ വൃക്ഷതൈ വിതരണം ഉദ്ഘാടനം ചെയ്തു.
നവനീതം സന്ദേശം വൈസ്‌ പ്രസിഡന്റ്‌ ടി.ആര്‍.വല്ലഭന്‍ നമ്പൂതിരിപ്പാട്‌ നിര്‍വഹിച്ചു. നിയുക്ത ശബരിമല മേല്‍ശാന്തി പി.എന്‍.നാരായണന്‍ നമ്പൂതിരിക്ക്‌ യോഗത്തില്‍ സ്വീകരണം നല്‍കി. വിവിധ ഉപസഭകളും സ്വീകരണത്തില്‍ പങ്കുചേര്‍ന്നു. വിവിധ കലാപരിപാടികളുടെ മത്സരം വിവിധ വേദികളില്‍ നടന്നു.
