കോതമംഗലം: സങ്കല്പ്പങ്ങളില്നിന്നും ഉടലെടുത്ത ബ്ലാക്ക്മാന് കുപ്രചരണം നെല്ലിക്കുഴി പഞ്ചായത്തിലെ വിവിധ പ്രദേശങ്ങളില് പരക്കുന്നത് മൂലം നിരവധി കുടുംബങ്ങളിലെ സ്ത്രീകളും കുട്ടികളും രാത്രി കാലങ്ങളില് ഭയവിഹ്വലരാകുന്നതായി പരാതി.
എച്ച്ഐവി അണുബാധയുള്ള ചിലയാളുകള് രാത്രികാലങ്ങളില് ബ്ലാക്ക്മാന് രൂപത്തില് സ്വന്തം രക്തം സിറിഞ്ചില് ശേഖരിച്ച് മറ്റുളളവരില് കുത്തി വച്ച് ഇരുട്ടില് മറയുന്നു എന്നാണ് കുപ്രചരണം അഴിച്ചുവിട്ടിരിക്കുന്നത്. ഇരുമലപ്പടി, ചെറുവട്ടൂര്, മേതല, ഇരമല്ലൂര്, കാട്ടാംകുഴി, ഊരംകുഴി തുടങ്ങിയ പ്രദേശങ്ങളില് ചായക്കടകള്, ഓട്ടോ സ്റ്റാന്റുകള്, കുളിക്കടവുകള്, സ്കൂളുകള് തുടങ്ങിയ ഇടങ്ങളിലാണ് ബ്ലാക്ക്മാന് ചര്ച്ച പുരോഗമിക്കുന്നത്. രണ്ട് വര്ഷംമുമ്പ് ഈ പ്രദേശങ്ങളില് തിരുട്ട് മോഷ്ടാക്കള് ഇറങ്ങിയിട്ടുണ്ടെന്ന പ്രചരണം ശക്തമാവുകയും ഇതുപോലെ ഭീതി പരത്തുകയും ചെയ്തു. അതിനെ തുടര്ന്ന് പ്രദേശത്തെ ജനങ്ങള് അന്ന് ജനകീയ കൂട്ടായ്മ സംഘടിപ്പിച്ചിരുന്നു. ഇത്തരം കുപ്രചരണങ്ങള് ആരംഭിച്ചിട്ട് മൂന്ന് ആഴ്ച ആയെങ്കിലും ഇതുമായി ബന്ധപ്പെട്ട കേസുകള് ഒന്നും റിപ്പോര്ട്ട് ചെയ്തതായി അറിവില്ല. രാത്രികാലങ്ങളില് ചില സാമൂഹിക വിരുദ്ധര്ക്ക് അഴിഞ്ഞാടുന്നതിന് നടത്തുന്ന ഇത്തരം കുപ്രചരണങ്ങളില് യാതൊരു സത്യവുമില്ലെന്നതാണ് വസ്തുത.
