കൊച്ചി: സ്ത്രീകള്ക്കെതിരെയുള്ള അതിക്രമങ്ങള് വര്ദ്ധിച്ചു വരുന്ന സാഹചര്യത്തില് ജില്ലയില് സ്ത്രീ സൗഹൃദകൂട്ടായ്മകള് സംഘടിപ്പിക്കുന്നതിന് ജില്ലാ സാക്ഷരതാ മിഷന് നേതൃത്വം നല്കുമെന്ന് ജില്ലാ സാക്ഷരതാ സമിതി ചെയര്മാന് കൂടിയായ ജില്ലാ പഞ്ചായത്ത് പ്രസിഡന്റ് എല്ദോസ് കുന്നപ്പിള്ളി പറഞ്ഞു.
സാക്ഷര കേരളത്തില് ഇത്തരം അനിഷ്ട സംഭവങ്ങള് ഉണ്ടാകാന് പാടില്ലാത്തതാണ്. എന്നാല് അക്ഷരജ്ഞാനം സാംസ്ക്കാരിക ബോധമായി വളരാത്തതാണ് ഇതിനു കാരണം. എല്ലാവരേയും അക്ഷരം പഠിപ്പിച്ചതുപോലെ എല്ലാവരേയും സംസ്കാര സമ്പന്നരാക്കുക എന്നതാണ് പുതിയ കാലഘട്ടത്തിലെ സാക്ഷരതാ പ്രവര്ത്തനമെന്നും പ്രസിഡന്റ് പറഞ്ഞു.
ജില്ലയിലെ വിവിധ ഗ്രാമപഞ്ചായത്ത്, നഗരസഭകളിലായി 195 സാക്ഷരതാ കേന്ദ്രങ്ങള് പ്രവര്ത്തിക്കുന്നുണ്ട്. ഇവിടുത്തെ ചുമതലക്കാരായ പ്രേരക്മാര് സ്ത്രീ സൗഹൃദ കൂട്ടായ്മയ്ക്ക് നേതൃത്വം നല്കും. തൃത്താല പഞ്ചായത്തുകള് ഇതിനാവശ്യമായ സഹകരണം ഉറപ്പാക്കണമെന്നും അദ്ദേഹം അഭ്യര്ഥിച്ചു.
ജില്ലയിലെ മുഴുവന് ഗ്രാമ, ബ്ലോക്ക്, നഗരസഭാതലങ്ങളിലെ സാക്ഷരതാ സമിതികള് യോഗം ചേര്ന്ന് ഇക്കാര്യം ചര്ച്ച ചെയ്യണമെന്നും പ്രസിഡന്റ് കൂട്ടിച്ചേര്ത്തു. അവയവദാനം പ്രോത്സാഹിപ്പിക്കുന്നതിന് ജില്ലാ സാക്ഷരതാ മിഷന് പ്രത്യേക കാമ്പയിന് ഏറ്റെടുക്കണമെന്നും പ്രസിഡന്റ് പറഞ്ഞു. ജില്ലയിലെ മുഴുവന് പ്രേരക്മാര്ക്കും ഇതിനായി പരിശീലനം നല്കും. ഒരു കുടുംബത്തിലെ ഒരംഗമെങ്കിലും അവയവദാനത്തിന് താത്പര്യം പ്രകടിപ്പിക്കുന്നഘട്ടം വരെ കാമ്പയിന് തുടരും. മാലിന്യ സംസ്കരണത്തിന്റെ ഭാഗമായി മണ്ണിരകമ്പോസ്റ്റിന്റെ പരിശീലനം പ്രേരക്മാര്ക്ക് നല്കും. സാക്ഷരതാ കേന്ദ്രങ്ങള് വഴി പൊതു ജനങ്ങള്ക്ക് പരിശീലനം നല്കുന്നതിന് സൗകര്യം ഒരുക്കുമെന്നും പ്രസിഡന്റ് പറഞ്ഞു.
നാല്, ഏഴ് തുല്യതാ ക്ലാസുകളുടെ പുതിയ ബാച്ചിന്റെ ഉദ്ഘാടനം ജനുവരി രണ്ടാംവാരം നടത്തും. പത്താംതരം തുല്യതാ പഠനകേന്ദ്രങ്ങളായി ജില്ലയിലെ 38 ഹൈസ്കൂളുകളാണ് നിലവിലുളളത്. ഇവിടങ്ങളില് അതത് തദ്ദേശ സ്വയംഭരണ സ്ഥാപനത്തിന്റെയും പോലീസിന്റെയും സഹായത്തോടുകൂടി ലോക്കല് സപ്പോര്ട്ട് ഗ്രൂപ്പ് രൂപീകരിക്കും. ക്ലാസുകള് നടക്കുന്നത് ഞായറായ്ചകളിലായതിനാല് സുരക്ഷാ ക്രമീകരണത്തിന്റെ ഭാഗമായിട്ടാണിത് ചെയ്യുന്നതെന്നും പ്രസിഡന്റ് കൂട്ടിച്ചേര്ത്തു.
