പെരുമ്പാവൂര്‍: സംസ്ഥാന സര്‍ക്കാര്‍ അനുമതി നല്‍കിയാല്‍ പെരുമ്പാവൂരിലെ ഇഎസ്‌ഐ ആശുപത്രി ഏറ്റെടുക്കുവാന്‍ ഇഎസ്‌ഐ കോര്‍പ്പറേഷന്‍ ഒരുക്കമാണെന്ന്‌ കേന്ദ്രമന്ത്രി കൊടിക്കുന്നില്‍ സുരേഷ്‌ പറഞ്ഞു. ഇന്നലെ പെരുമ്പാവൂരിലെത്തിയ മന്ത്രി ഇഎസ്‌ഐ ആശുപത്രിയില്‍ നടത്തിയ സന്ദര്‍ശനത്തിന്‌ ശേഷമാണ്‌ ഇക്കാര്യം അറിയിച്ചത്‌. ഇപ്പോള്‍ ഈ സ്ഥാപനം കേരള സര്‍ക്കാരിന്റെ ഉടമസ്ഥതയിലാണുള്ളത്‌. കോര്‍പ്പറേഷന്‍ ഏറ്റെടുത്താല്‍ 50 ബെഡ്ഡുകളുള്ള കിടത്തി ചികിത്സക്കുള്ള സൗകര്യവും ഒരുക്കാനാകുമെന്നും മന്ത്രി പറഞ്ഞു.
പെരുമ്പാവൂരില്‍ മരവ്യവസായ ശാല ഉടമകള്‍ കഴിഞ്ഞ രണ്ടാഴ്ചക്കാലമായി നടത്തിവരുന്ന അനിശ്ചിതകാല സമരത്തിന്റെ സമരപ്പന്തല്‍ മന്ത്രി സന്ദര്‍ശിച്ചു. എത്രയും വേഗം പ്രശ്നപരിഹാരം കാണുന്നതിന്‌ മന്ത്രി ഇടപെടണമെന്നും കാര്‍ഷിക മാലിന്യമായ റബ്ബറിന്റെ എക്സൈസ്‌ തീരുവ ഒഴിവാക്കണമെന്നും മരവ്യവസായികള്‍ മന്ത്രിക്ക്‌ നിവേദനം നല്‍കി. മരവ്യവസായികളുടെ പ്രശ്നത്തില്‍ എത്രയും വേഗം മുഖ്യമന്ത്രിയുമായി ബന്ധപ്പെട്ട്‌ പരിഹാരശ്രമം നടത്തുമെന്ന്‌ കേന്ദ്രമന്ത്രി അറിയിച്ചതായി അസോസിയേഷന്‍ ഭാരവാഹികള്‍ പറഞ്ഞു.
