ഇസ്ലാമാബാദ്: പാക് പ്രസിഡന്റ് ആസിഫ് അലി സര്ദാരിക്കെതിരായ അഴിമതിക്കേസുകള് പുനരുജ്ജീവിപ്പിക്കുന്നതിന് സ്വിസ് അധികൃതര്ക്കയച്ച കത്തിന്റെ കരട് രേഖ സുപ്രീം കോടതി അംഗീകരിച്ചു. ഫെഡറല് നിയമന്ത്രി ഫറൂഖ് എച്ച്.നയീക്കാണ് സര്ക്കാരിനുവേണ്ടി കത്തിന്റെ പകര്പ്പ് ഇന്നലെ കോടതിയില് സമര്പ്പിച്ചത്. നാല് വര്ഷമായി സര്ക്കാരും കോടതിയും തമ്മില് തുടരുന്ന നിയമ യുദ്ധത്തിന് ഏതാണ്ട് നാന്ദി കുറിച്ചതായാണ് മാധ്യമങ്ങള് വിലയിരുത്തുന്നത്.
ജസ്റ്റിസ് നസീര് ഉള് മുള്ക്ക്, ജസ്റ്റിസ് ആസിഫ് സയിദ് ഖോസ, ജസ്റ്റിസ് അസ്മാത് സയിദ് ഷെയിക് എന്നിവരടങ്ങിയ ബെഞ്ചാണ് കേസ് പരിഗണിച്ചത്. നേരത്തെ ഒരു തവണ കത്തിന്റെ പകര്പ്പ് സര്ക്കാര് സമര്പ്പിച്ചിരുന്നുവെങ്കിലും അത് കോടതി തള്ളിക്കളഞ്ഞിരുന്നു. പുതുതായി സര്ക്കാര് സമര്പ്പിച്ച കത്തില് പുരോഗതിയുണ്ടെന്നും നടപടിയുമായി പാക്ക് സര്ക്കാരിന് മുന്നോട്ടുപോകാമെന്നും കോടതി നിരീക്ഷിച്ചു.
കേസ് നവംബര് 14 ന് വീണ്ടും പരിഗണിക്കും. പര്വേസ് മുഷറഫ് പ്രസിഡന്റായിരുന്ന കാലത്ത് നടന്ന അഴിമതിക്കേസുകള് പുനരുജ്ജീവിപ്പിക്കുന്നതിന് സ്വിസ് അധികൃതര്ക്ക് എത്രയും പെട്ടെന്ന് കത്തയക്കുമെന്ന് പ്രധാനമന്ത്രി രാജാ പര്വേസ് അഷ്റഫ് ഇന്നലെ സുപ്രീം കോടതിയെ അറിയിച്ചു. നേരത്തെ സര്ക്കാര് തയ്യാറാക്കിയ കരട് രേഖയില് പ്രസിഡന്റിന് ഭരണഘടനാപരമായ പരിരക്ഷയുണ്ടെന്ന നിലയിലാണ് കത്ത് കോടതിയില് സമര്പ്പിച്ചത്. കത്ത് തള്ളിയ കോടതി പ്രധാനമന്ത്രിക്ക് അന്ത്യശാസനം നല്കുകയും ചെയ്തു. സര്ദാരിക്കെതിരായ കേസ് പുനരന്വേഷിക്കുന്നതിന് സ്വിസ് അധികൃതര്ക്ക് കത്തെഴുതാന് ജനുവരിയിലാണ് കോടതി നിര്ദ്ദേശിച്ചത്.
എന്നാല് അന്ന് പ്രധാനമന്ത്രിയായിരുന്ന യൂസഫ് റാസ ഗിലാനി ഇതിന് വഴങ്ങാത്തനിത്തുടര്ന്ന് കോടതിയലക്ഷ്യക്കേസില് അദ്ദേഹത്തെ കോടതി അയോഗ്യനാക്കുകയും ചെയ്തിരുന്നു. തുടര്ന്നാണ് രാജാ പര്വേസ് അഷ്റഫ് പ്രധാനമന്ത്രിയായി എത്തുന്നത്. ഗിലാനിക്ക് നല്കിയ നിര്ദ്ദേശം തന്നെയാണ് സുപ്രീം കോടതി പര്വേസിനും നല്കിയത്. ഒരു ഘട്ടത്തില് ഗിലാനിയുടെ അവസ്ഥ തന്നെ പര്വേസിനും ഉണ്ടാകുമെന്ന് പാക്കിസ്ഥാനിലെ രാഷ്ട്രീയ വിദഗ്ധര് വിലയിരുത്തിയിരുന്നു. നിര്ദ്ദേശം പാലിക്കാത്തതിനെത്തുടര്ന്ന് കോടതിയില് ഹാജരാകാന് പ്രധാനമന്ത്രിയോട് നിര്ദ്ദേശിച്ച കോടതി സ്വിസ് അധികൃതര്ക്ക് എത്രയും പെട്ടെന്ന് കത്തെഴുതാനും നിര്ദ്ദേശിച്ചു. അല്ലാത്ത പക്ഷം കോടതിയലക്ഷ്യനടപടികള് സ്വീകരിക്കുമെന്നും കോടതി മുന്നറിയിപ്പ് നല്കിയിരുന്നു.
പാക്കിസ്ഥാന് പീപ്പിള്സ് പാര്ട്ടിയുമായി ആലോചിച്ചതിനുശേഷമാണ് ഇപ്പോള് സ്വിസ് അധികൃതര്ക്ക് കത്തെഴുതാന് സര്ക്കാര് തയ്യാറായത്. സര്ദാരിയുടെ മൗന സമ്മതവും ഇതിന് ലഭിച്ചിട്ടുണ്ടെന്നാണ് അധികൃതര് പറയുന്നത്. ഇതിന് പിന്നിലുള്ള രഹസ്യം എന്താണെന്ന് അഴിമതിക്കേസിന്റെ അന്വേഷണം ആരംഭിച്ചതിനുശേഷം പുറത്തുവരുമെന്നാണ് മാധ്യമങ്ങള് റിപ്പോര്ട്ട് ചെയ്യുന്നത്.
